Si ministër i Ekonomisë, Kulturës dhe Inovacionit Blendi Gonxhe plotësohet me Operatorin e Blerjeve të Përqendruara, ku bën pazaret e tenderëve. Qysh kur u shkri agjencia e Blerjeve të Përqendruara, që ishte në varësi të Ministrisë së Brendshme, funksionet i kaluan institucionit të drejtuar nga Blendi Gonxhe. Ky i fundit ka nisur me intensitet të madh të menaxhojë fondet e qeverisë, sipas eksperiencës së tij të gjatë me tenderat.
Javët e fundit Operatori po zhvillon prokurime të mëdha për furnizimin me ushqime të spitaleve. Këtë herë radhën e ka Spitali Memorial Fier, i ndërtuar nga Erdogan, i cili prej kohësh është kthyer në një gropë thithëse për fondet.
Më datë 22 korrik 2024, Operatori i Blerjeve të Përqendruara në varësi të Ministrisë së Gonxhes ka mbyllur tenderin me objekt ‘Shërbim dhe shpërndarje ushqimi për Spitalin Rajonal Memorial Fier’. 401 milionë lekë (pa TVSH) do të shfrytëzohen për këtë prokurim, ku nuk përcaktohen specifikisht ushqimet që do të blihen dhe sasitë, por janë emërtuar vetëm si dieta.
Kjo është një mënyrë tjetër për të krijuar hapësira për abuzim.
Zakonisht për tendera me vlerë të madhe shfaqin interes disa kompani dhe administratorja e Gonxhes në krye të Operatorit detyrohet të gjejë ndonjë argument për t’i skualifikuar konkurrentët dhe kontratat të përfundojë në duart e kompanisë që favorizohet.
Këtë herë e ka patur më të lehtë pasi vetëm firma “LALA COMPANY” SH.P.K ka dorëzuar një ofertë. “Lala” propozon ta kryejë furnizimin me 398 milionë lekë, sa 99.5% e fondit limit. Oferta në fjalë duhej skualifikuar për shkak se është shumë e shtrenjtë. Ndërkohë, procedurat nuk duhej të kishin vazhduar, pasi ishte në garë vetëm një kompani dhe kemi mungesë konkurrence.
Administratorja e Gonxhes ka firmosur kontratën me firmën “LALA COMPANY” SH.P.K. duke anashkaluar kështu ligjin mbi prokurimet.
Sigurisht Open Data Albania i ka vendosur tenderit ‘Flamurin e Kuq”, për të treguar se po abuzohet me fondin e spitalit. Kujtojmë se “Flamuri” është shenja e përdorur për riskun e korrupsionit.
Ky prokurim është pjesë e një serie procedurash me shkelje ku objekt është ushqimi i të sëmurëve. Në 17 korrik 2024, Gijotina.com denoncoi tenderin me objekt “Shërbim gatimi dhe shpërndarje ushqimi, për Spitalin psikiatrik “DR. Sadik Dinci”, Elbasan” me fond limit 4.7 milionë euro. Edhe ky tender u dha pa garë fare tek bashkimi i operatorëve BOE GERTI-1987 sh.p.k & DAJTI PARK 2007 sh.p.k.
Pra kemi të bëjmë me tenderë me të njëjtin objekt, për spitale dhe shifra të ndryshme, por me të njëjtën skemë abuzimi.
Firma “Lala Company” me pronar Arjan Lalën e ka marrë gjithmonë këtë kontratë qysh nga viti 2022 dhe gjithmonë me “Flamur të kuq”. Tenderi i vitit 2022 është anuluar dy herë dhe në fund i është dhënë sërish Lalës. Sipas kontratës së lidhur e cila është sa trefishi i vlerës së prokurimeve të viteve të mëparshme, afati i furnizimit do të jetë 2-vjeçar. Pra, duket si një tip koncesioni i pashpallur, pasi është e njëjta kompani që vazhdon dhe kryen furnizimin e Spitalit Memorial të Fierit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post