Blendian Dalipi i xhiron 1 milion Euro familjes Ismailaj për pajisje elektrike, tenderi me “Flamur të kuq”

Blendian Dalipi administratori i Operatorit të Sistemit të Shpërndarjes ka realizuar “gol” 1 milion eurosh me tenderin e fundit që ka firmosur.

Këtë herë ai ka urdhëruar që të blihen materiale elektrike, për të justifikuar nxjerrjen nga arka të 1 milionë eurove. Konkretisht bëhet fjalë për tenderin me objekt ‘Blerje pajisje primare për N/stacione elektrike të shpërndarjes’. Është fond i madh për blerje të tilla, por Dalipi pikërisht tek fondi e ka syrin. Këtë e tregon mënyra abuzive se si është zhvilluar kjo procedurë.

Janë paraqitur fillimisht 4 oferta, por 3 prej tyre janë skualifikuar menjëherë nga komisioni i Dalipit me argumente se kanë mungesë dokumentacioni. Gara është lënë e hapur 1 muaj dhe në këtë periudhë Autoriteti Kontraktor duhej t’i kishte njoftuar për këto mungesa dhe të priste  përgjigjen e tyre.

Kjo e drejtë iu është hequr firmave, duke i mënjanuar nga konkurrimi. Në këtë mënyrë i është hapur rruga firmës VIBTIS shpk.

Kompania është në pronësi të Ismailaj Grup ku kanë patur aksione i gjyshi, i ati Jonuz Ismailaj dhe xhaxhai Idajet Ismailaj, të cilët kanë vendosur që nga viti 2022, që 100% të aksioneve t’i menaxhojë një 36-vjeçar, emri i të cilit është më pak i lakuar. Theksojmë se më parë pjesë e aksioneve që në themelim ka qenë edhe oligarku Idajet Ismailaj. Me kompanitë e tyre Ismailajt kanë përfituar miliarda lekë nga Thesari i Shtetit.

Ky tender është vlerësuar nga Open Data Albania me “Flamurin e kuq”, që është shenja e riskut të korrupsionit. Kjo për shkak se firma në fjalë e mori kontratën pa garë.

Më datën 9 shtator kur u mbaj tenderi, vetëm zarfi i VIBTIS shpk ishte në tavolinën e komisionit të vlerësimit.

Kujtojmë se fituesi i këtij tenderi është mësuar të favorizohet me tendera dhe koncesione. Familja Ismalaj është pronare e kompanisë ALB-STAR, që ka ngritur kulla në kryeqytet, zotërues të disa koncesioneve dhe zaptues të plazhit të Manastirit mes Sarandës dhe Ksamilit.

©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201