Sekretari amerikan, Antony Blinken ka bërë të ditur se në bisedën telefonike me kryeministrin e Kosovës, Albin Kurti i ka kërkuar de-përshkallëzimin e situatës në veri dhe kthimin e menjëhershëm në dialogun e lehtësuar nga Bashkimi Evropian.
Blinken në një postim në Twitter shkruan se plani trepikësh i BE-së është rruga përpara.
Edhe zyra e kryeministrit ka njoftuar për telefonatën Blinken-Kurti.
Në njoftim thuhet se Kurti dhe Blinken folën për gjendjen në katër komunat veriore të Kosovës. Kryeministri i Kosovës ka thënë se zgjedhjet e reja duhen paraprirë nga sundimi i ligjit.
U fol edhe për ekstremistët e dhunshëm që sulmuan ushtarët e KFOR-it, Policinë e Kosovës dhe gazetarët.
Theksohet se Kurti i ka përmendur Blinkenit konfiskimin e armatimit e municionit të shumtë në një veturë me targa të Beogradit.
“U fol për nevojën për zbatim të plotë, të sekuencuar drejt e pa kushte të Marrëveshjes Bazike të Brukselit, si dhe për lirimin e tre policëve të Kosovës të rrëmbyer nga Serbia në Leposaviq por pasi që atyre iu ngrit aktakuza e për çfarë Departamenti i Shtetit Amerikan i pari kërkoi lirim të menjëhershëm e pa kushte.
Të dy u pajtuan që të mbeten në komunikim të rregullt e të dendur në funksion të paqes e sigurisë në Kosovë e drejt normalizimit të marrëdhënieve me Serbinë”, thuhet në njoftim e qeverisë.
Discussion about this post