Sekretari amerikan i Shtetit, Antony Blinken tha të shtunën se kishte diskutuar mbi agresionin rus në Ukrainë prej më shumë se pesë orësh me Ministrin e Jashtëm kinez Wang Yi, në të cilat ai ngriti shqetësimet mbi përafrimin e Pekinit me Moskën.
“Pavarësisht kompleksitetit të marrëdhënieve tona, mund të them me njëfarë sigurie se delegacionet tona i cilësuan bisedimet e sotme të dobishme, të sinqerta dhe konstruktive. Shpreha shqetësimin e thellë të SHBA-së për retorikën dhe aktivitetet gjithnjë e më provokuese të Pekinit ndaj Tajvanit”, tha Blinken, raporton Reuters.
Blinken tha se presidenti kinez Xi Jinping kishte bërë të qartë vendimin e tij për të krijuar një partneritet me Rusinë pas një telefonate që kishte pasur me presidentin Vladimir Putin më 13 qershor. Para pushtimit të Ukrainës nga Rusia më 24 shkurt, Pekini dhe Moska njoftuan një partneritet “pa kufij”. Zyrtarët amerikanë kanë thënë se nuk e kanë parë Kinën t’i shmanget sanksioneve të ashpra të udhëhequra nga SHBA ndaj Rusisë ose t’i sigurojë asaj pajisje ushtarake.
Blinken tha se nuk shihte asnjë tregues nga Rusia se ajo po synon të angazhohet në një diplomaci serioze. Ditën e djeshme, Ministri i Jashtëm rus Sergej Lavrov u largua nga takimi i G20 pas një breshëri kritikash për pushtimin rus të Ukrainës.
Discussion about this post