Sekretari amerikan i Shtetit Antony Blinken i kërkoi homologut rus, Sergey Lavrov, që të lirojë menjëherë një gazetar të gazetës “Wall Street Journal”, i cili u ndalua javën e kaluar, si dhe amerikanin Paul Whelan të burgosur që nga viti 2018.
Kryediplomati amerikan zhvilloi një bisedë të rrallë telefonike me homologun rus që nga fillimi i luftës në Ukrainë, njoftoi të dielën Departamenti i Shtetit.
Në bisedën telefonike me Ministrin e Jashtëm rus Sergej Lavrov, kryediplomati Blinken shprehu shqetësimin e thellë për ndalimin nga Kremlini të gazetarit Evan Gershkovich nën akuzat për spiunazh, njofton Departamenti i Shtetit. Sekretari Blinken bëri thirrje për lirimin e tij të menjëhershëm. Shefi i diplomacisë amerikane i kërkoi Kremlinin lirimin e menjëhershëm edhe të amerikanit Paul Whelan, të arrestuar gabimisht, thuhet në deklaratë.
Ministri i Jashtëm rus Sergei Lavrov u përgjigj duke thënë se SHBA nuk duhet të përpiqet të “bëjë bujë” ose të politizojë arrestimin. Evan Gershkovich u arrestua të premten me akuzën për spiunazh.
Ministria e Jashtme ruse të dielën konfirmoi se Lavrov dhe Blinken diskutuan arrestimin e Gershkovich në një telefonatë që u iniciua nga SHBA. Sipas Departamentit të Shtetit të SHBA-së, Blinken përcolli “shqetësimin e madh për ndalimin e papranueshëm të një gazetari amerikan nga Rusia”.
Lavrov u përgjigj duke përsëritur pretendimet e Rusisë se Gershkovich u kap “në flagrancë duke u përpjekur të merrte informacion të klasifikuar” dhe se çështja e tij do të trajtohet nga gjykatat ruse, thuhet në një deklaratë nga ministria e jashtme ruse.
Lavrov paralajmëroi gjithashtu zyrtarët dhe mediat amerikane që të mos nxisin “histerinë” rreth arrestimit të gazetarit.
Discussion about this post