Shtetet e Bashkuara do të shqyrtojnë çdo mjet për të çuar përpara diplomacinë me Rusinë nëse sheh një mundësi, por tani Moska nuk duket e gatshme të angazhohet në bisedime kuptimplote, tha të premten Sekretari amerikan i Shtetit Anthony Blinken .
“Të gjitha indikacionet tregojnë se presidenti Putin jo vetëm që nuk është i gatshëm për diplomaci kuptimplote, por përkundrazi vazhdon të shtyjë në drejtim të kundërt”, tha Blinken në një konferencë shtypi të mbajtur së bashku me homologen e tij franceze Catherine Colonna.
“Ne po shqyrtojmë dhe do të shqyrtojmë çdo mjet për të çuar përpara diplomacinë nëse shohim një mundësi për ta çuar përpara atë në çfarëdo mënyre “, tha ai, duke shtuar se në vend të kësaj Moska “dyfishon dhe trefishon” veprimet e saj agresive.
Më herët të premten, sekretari amerikan i mbrojtjes Lloyd Austin foli me telefon me homologun e tij rus, Sergei Shoigu, për herë të parë që nga maji. Sipas deklaratës së Pentagonit, ai tha se është e rëndësishme të ruhen linjat e komunikimit në mes të luftës në Ukrainë .
Iniciativa për këtë telefonatë është marrë nga pala amerikane. Një diplomat kryesor rus shpjegoi, sipas agjencisë TASS, se ky komunikim ishte i nevojshëm për të “zbardhur keqkuptimet” në mënyrë që “të mos ketë aksidente“.
“Këto janë gjithmonë kontakte të rëndësishme dhe është e rëndësishme që amerikanët morën iniciativën,” citohet të ketë thënë Konstantin Gavrilov me bazë në Vjenë. Pas kësaj telefonate, Moska pret sqarime për stërvitjet e parandalimit bërthamor të kryera nga NATO, shtoi ai.
Së fundi, për Iranin, sekretari amerikan i shtetit tha se SHBA beson se diplomacia është mënyra më e mirë për të adresuar çështjen e programit bërthamor të Teheranit, por aktualisht nuk sheh një ringjallje të afërt të marrëveshjes së vitit 2015 për shkak të ndërhyrjes së Teheranit në punët e jashtme.
Discussion about this post