Reshjet e dendura të shiut bllokuan sot aksin Vlorë-Orikum nga balta që mbuloi rreth 70 metra të rrugës. Prej disa orësh, fadromat po punojnë për pastrimin baltës. Në terren ndodhet dhe kryebashkiaku Dritan Leli, që thotë se puna do të vazhdojë pa ndërprerje deri në zhbllokimin e plotë të këtij aksi rrugor.
“Mjetet e ARRSH-së, ujësjellësit dhe të firmave private po punojnë në terren. Është liruar pjesa më e madhe e rrugës. Po pastrohen metrat e fundit, që më pas të fillojë trafiku në të dy krahët. Gjithë Ndërmarrja e Ujësjellës Kanalizimeve janë këtu për të bërë më të mirën“, u shpreh Leli.
Shirat e rrëmbyeshëm dhe të pandërprerë, kanë sjellë edhe problemet e para në aksin nacional Berat-Skrapar. Në fshatrat Vodicë dhe Fushë-Peshtan ka filluar rrëshkitja e gurëve në rrugë, duke vështirësuar qarkullimin e mjeteve në këtë aks.
Aksi Berat-Skrapar është një aks nacional me shumë kthesa dhe i pandriçuar, gjë që jo vetëm sjell vështirësi në qarkullimin e mjeteve kur në rrugë ka prezencë të shtuar gurësh por shpesh-herë është shndërruar edhe në burim aksidentesh.
Discussion about this post