Një raport i publikuar nga Policia Bashkiake e Kryeqytetit tregon se në 8 muaj janë vendosur 9783 gjoba ndaj subjekteve dhe qytetarëve që kanë zënë hapësirat publike. Ky raport bazohet përgjatë periudhës Janar-Gusht 2021, ku sipas të dhënave më të fundit të publikuara, numri më i lartë i gjobave është vendosur në muajin Maj, afro 2400 masa administrative ndërsa më pak ndëshkime janë ndërmarrë në muajin Prill, ku regjistrohen vetëm 6 gjoba.
E llogaritur në mesatare, policia bashkiake ka vendosur afro 1200 gjoba çdo muaj dhe bëhet fjalë kryesisht për penalizime ndaj bareve dhe restoranteve që zaptojnë trotuaret në funksion të biznesit të tyre. Sa i takon njësive me problematike, rezultojnë të jenë njësitë e vjetra të Tiranës, ku kryeson njësia nr.6 apo zona e Kombinatit, e ndjekur nga Lapraka dhe njësia nr.4, ndërsa nga zonat periferike më problematike rezulton Kashari, Dajti dhe Farka, ndërsa në pjesën tjetër nuk janë ndërmarrë masa administrative. Sipas legjislacionit në fuqi, subjektet tregtare duhet të pajisen me leje shfrytëzimi për hapësirat publike, në rast të kundërt do penalizohen administrative deri në revokimin e lejes.
Gjobat vendosen edhe në rastet kur konstatohet: Tejkalim i sipërfaqes së shfrytëzuar; Vendosje të objekteve të pa autorizuara; Rrethim dhe kufizim i trotuareve të kalimtareve; Keqpërdorimi dhe interpretimi i lejes. Sipas ligjit, ndalohet zënia e hapësirës publike dhe hapësirave mbi apo nën të, në territorin e Bashkisë së Tiranës, qoftë edhe përkohësisht, me çfarëdo lloj sendi apo objekti pa lejen apo autorizimin e bashkisë apo strukturës përgjegjëse për mirëmbajtjen dhe menaxhimin e tyre. Për zënien e hapësirës publike pa lejen përkatëse subjektet gjobiten nga 1000-20.000 mijë lekë.
