Pas Vlorës edhe pronarët e skafeve në Durrës kanë dalë në protestë kundër vendimit të policisë për bllokimin e mjeteve lundruese. Ata kanë zhvilluar një protestë pranë drejtorisë së policisë kufitare. Ata shprehen se kanë paguar taksat dhe është e padrejtë të ndërpresin aktivitetin në mes të sezonit turistik. Sipas tyre, janë komfort ndaj rregullores dhe e zbatojnë me përpikmëri, ndërsa e cilësojnë situatën jo normale.
Policia kufitare ka nisur një aksion për bllokimin e mjeteve lundruese pas tragjedisë në Potam të Himarës ku mbeti e vrarë 7-vjeçarja Jonada Avdia pasi u godit me skafin e drejtuar nga polici Arjan Tase. Ky vendim ka nxjerrë në protestë drejtuesit e këtyre mjeteve fillimisht në Vlorë dhe ditën e djeshme në Veliopjë. Të cilët janë shprehur se disa pronarë, miq të qeverisë, policia ua lejojnë mjetet lundruese.
Në fjalën e tyre operatorët shprehen se mjetet dhe lundrimi po bllokohen pa arsye për shkak të një aksidenti që ka ndodhur nga një mjet privat në kulmin e sezonit turistik ndërkohë që skafet lundrojnë pa pengesa. “Ka qenë një individ që e ka nxjerrë skafin, jo një biznes. Pse duhet të na bllokojnë neve? Aksidente ndodhin edhe rrugore, pse nuk bllokohen makinat me qera në raste kur ndodhin aksidente të tilla”– u shpreh njëri prej pronareve të mjeteve lundruese. “Dëgjojmë shumë nëpër media, motorrët, lacat me varëse floriri, por sic e shikoni këtu nga ne janë të gjithë familjarë, dhe jemi vetëm ne që penalizohemi, jo të tjerët që bëjnë dëmin”– u shpreh një tjetër protestues. Administratorët e këtyre biznese shprehen se zotërojnë të gjithë dokumentacionin përkatës ligjor dhe i kanë paguar taksat edhe për këtë periudhë që janë pezulluar dhe nuk kanë fituar të ardhura.
Discussion about this post