Me urdhër politik, këshilli Bashkiak i Vlorës “bllokon” nisjen e punës në Landfillin e Vlorës. Gjatë mbledhjes së sotme të këshillit Bashkiak Vlorë, u kërkua diskutimi dhe votimi mbi shtimin e punonjësve të landfillit të Vlorës për të nisur kështu funksionimin e landfillit të përpunimit të mbetjeve.
Edhe pse landfilli mbetet në pritje të punonjësve për të nisur punën, këshilli Bashkiak i Vlorës, me urdhër politik nuk ka pranuar të hedh në votim këtë çështje.
Gjatë diskutimit sekretari i mbetur në detyrë Agron Gjipali nuk ka pranuar të diskutohet dhe as të votohet çështja e Landfillit.
Bashkia e Vlorës ka një kontratë me Ministrinë e Financave dhe KVF gjermane për ndërtimin dhe vendosjen në funksion të Landfillit të Vlorës.
Qeveria Gjermane ka kërkuar shtim të numrit të punonjësve në muajin Prill me qëllim trajnimin e tyre. Për shkak të pandemisë vendimi për shtimin e punonjësve u shty.
Sipas Këshilltarit Grigor Dede (në rolin e kryetarit të grupit të këshilltarëve), vendimi për të mos votuar këtë pikë është politik.
Investimi prej 25 milionë euro, i nisur në Qershor të vitit 2020, ngec për kaprico politike të Këshilltarëve Socialist të cilët në arsyetimin e tyre në mbledhjen e këshillit Bashkiak vendimin për “bllokim” e kanë quajtur vendim politik.
Por rreziku më i madh mbetet prishja e kontratës me Bashkinë për mos plotësim të kushteve nga kjo e fundit.
