Nuk ka vonuar reagimi i policisë edhe ndaj tre vajzave që dolën nga makina për të kërcyer në mes të trafikut tek Unaza e Re.
Policia e Shtetit bën me dije se pas denoncimit në rrjetet sociale, nga qytetarët që kanë filmuar vajzat që kërcejnë pa e vrarë mendjen për atë që po shkaktonin me gjestin e tyre, ka identifikuar 21 vjeçaren e cila ishte drejtuese e makinës. Gjithashtu nga verifikimet e kryera, policia bën me dije se 21 vjeçarja banuese në Tiranë nuk kishte as patentë.
E reja e cila ka inicialet V.D, është gjobitur me 50.000 lekë të rinj, për veprime të ndaluara në rrugë, ndërsa mjeti u sekuestrua në cilësinë e provës materiale. Sipas bluve të kryeqytetit, po punohet për identifikimin dhe procedimin e personit përgjegjës që i ka besuar mjetin shtetases së papajisur me leje drejtimi.
Kujtojmë se ky nuk është rasti i parë i një ngjarjeje të tillë, pasi para 2 ditësh u gjobitën dhe u bllokuan makinat nga Policia e Lezhës, 4 dasmorëve që bllokuan rrugën Lezhë-Mamurras për të kërcyer.
