Blushi-qytetarëve: Merrni pjesë masivisht në referendumin historik të 11 majit

Sekretari i Përgjithshëm i Partisë së Lirisë Tedi Blushi në një deklaratë për mediet iu bëri thirrje qytetarëve shqiptarë që të marrin pjesë masivisht në zgjedhjet parlamentare të 11 majit, “për të çelur të gjithë së bashku një epokë të re për Shqipërinë e dekadave”.

“Të marrim pjesë masivisht në referendumin historik të 11 majit. Vota është fuqia e vërtetë dhe më e madhe e çdo qytetari, sidomos e të rinjve, që kërkojnë dhe mezi presin ndryshimin e madh”, tha Blushi.

Blushi theksoi se “pjesëmarrja në zgjedhje, është një mision i lartë patriotik dhe qytetar ndaj askush nuk duhet të mungojë!”.

Sipas Blushit “11 Maji është një mundësi e madhe edhe për socialistët e ndershëm që të ndëshkojnë me votë keqqeverisjen, plaçkitjen dhe korrupsionin e tmerrshëm të “Rilindjes”, që nuk ka asgjë socialiste”.

“Më 11 maj socialistët e ndershëm dhe të vërtetë, do të jenë një forcë ndëshkuese dhe do të votojnë për ndryshimin”, tha Blushi.

Blushi nënvizoi se “na duhen vetëm 100 ditë, për të ndryshuar të ardhmen e shqiptarëve dhe rritur mirëqenien e tyre”.

Po ashtu, Blushi ftoi qytetarët e Tiranës dhe të gjithë Shqipërisë “të bashkohemi sot në “Bulevardin e Ri”, në mitingun madhështor të fitores”.