Nënkryetari i selisë blu, Luçiano Boçi, së bashku me Oerd Bylykbashin dhe një grup mbështetësit, kanë dhënë sot një deklaratë për media, ku kanë theksuar me forcë se aksioni opozitar nuk të ndalet, pavarësisht heqjes së lirisë që i kanë bërë liderit të opozitës, kryetarit të PD-së, Sali Berishës.
“Pjesa e aksionit tonë nuk ndalet. Unë e di shumë mirë se me këto veprime mazhoranca dëshmon hallin e vet e të kapurit nën korrupsion.
Nuk është halli ynë sot, megjithëse transmetohet si i tillë dhe të vërtetën e dinë shqiptarët dhe mediat.
Aksioni ynë do të vazhdojë dhe të mos mendojë kush se PD-ja do të stepet. Ne e kemi kryetarin tonë, e kemi të qartë strategjinë e aksionit!
Mosbindja civile do të jetë e fortë në vitin që na pret dhe do të dëshmohet edhe në sallën e parlamentit dhe sigurisht edhe nga demokratët.
Sot është sulmuar jo thjesht Sali Berisha, jo thjesht PD-ja, por e gjithë shoqëria shqiptare në dimensionin e lirisë dhe të demokracisë.
Janë vlera thelbësore që kanë pasoja në të gjithë jetën tonë dhe japin pasoja në braktisjen e këtij vendi, në humbjen e vlerave që ka Shqipëria. Ne do të vazhdojmë betejën tonë dhe në selinë e imponuar të PD-së”, u shpreh ai.
Ndërsa, Bylykbashi theksoi se në Shqipëri nuk ka më demokraci kur goditet lideri i Opozitës.
“Vendimi i djeshëm është dëshmia që ka përfunduar ajo periudhë që gjithë shqiptarët mendonin se është një periudhë demokracie.
Atë që e ngritën studentët më 8 dhjetor më pas u sanksionua me 11 dhjetor të ’90 me themelimin e Partisë Demokratike që ishte flamuri i pluralizmit politik i cili është themeli i demokracisë. Nuk mund të ketë demokraci pa pluralizëm. Ajo që u ngritën ata studentë atëherë dhe themeluan atë parti, pikërisht ai vendimi i djeshëm i jep fund atij iluzionit që mund të ketë akoma ndokush se në këtë vend ka demokraci.
Është një vendim që qartazi nuk kemi pse mos ta përsërisim, të gjithë e dinë nga ana tjetër goditet opozita, duke goditur liderin e saj. Jo vetëm duke e arrestuar por duke i hequr të drejtën e fjalës komunikimit dhe të organizimit”, u shpreh ai.
Discussion about this post