Komisioni Qendror i Zgjedhjeve po bën 270 milionë lekë shpenzime për bojë për identifikimin e votuesve dhe transport qendrat e votimit. Të dy tenderët i tejkalojnë nevojat e 14 majin 2022 dhe parashikojnë kohëzgjatje 36 muaj. Mos vallë KQZ po përgatitet qysh tani edhe për zgjedhje e vitit 2025? Sa të presë vitin 2025, që nuk i dihet nëse do të jetë kryetar i KQZ-së, ka menduar që më mirë është “të kap ç’a t’kapësh”, qysh tani para zgjedhjeve vendore.
Boja për zgjedhjet e vitit 2025?!
Në buletinin e fundit të Agjencisë së Prokurimeve Publike është regjistruar tenderi me objekt “bojë timbruese për votuesit”. Në dokument evidentohet se për këtë tender do të shpenzohen 23,616,000 lekë (të reja). Kontrata pritet të lidhet me datë 25 janar 2023 dhe të jetë gati për zgjedhjet vendore që na presin. Por nuk përjashtohen dhe të papriturat.
Megjithëse nuk përmenden zgjedhjet politike të vitit 2025, afati vendosur për përmbushgjen e porosisë është 3 vjet. Pra, çfarëdo të ndodhë, Celibashi i xhiron paratë qysh tani për zgjedhjet vitit 2025. Ndërkaq, edhe për prokurimin tjetër me objekt” Shërbim Transporti me afat 36 muaj” ka një kohëzgjatje që e përfshin 2025-n. Ky prokurim e ka vlerën 7,078,000 lekë të reja. Dokumenti i publikuar bën me dije se fituesi i këtij tenderi është shpallur firma, në pronësi të biznesmenit Paqësor Malaj.
Janë tenderë të cilët mund të fillojnë të vihen në zbatim nga muaji shkurt. Për këtë lindin dyshime se përgatitja voluminoze po bëhet për ndonjë rrezik “zgjedhjesh të parakohshme”, sepse viti 2025 është akoma larg.
9 milionë lekë për website
Përveç bojës dhe transportit KQZ, po harxhon 9 milionë lekë për faqen e internetit. Dokumentet e siguruara tregojnë se Komisioni Qendror i Zgjedhjeve ka vendosur të mirëmbajë faqen e internetit duke shtuar masat e sigurisë nëpërmjet shërbimeve të “hostimit”. Ky shërbim parashikohet të jetë më i kushtueshëm sesa i një faqeje normale.
Konkretisht vetëm për këtë faqe, KQZ ka shpallur një tender me fond 9 milionë lekë për hostimin dhe mbrojtjen nga sulmet për ëebsajtin kryesor të KQZ-së dhe disa faqe portalesh të KQZ-së. Ky shërbim ëeb-hosting do të ofrohet për një periudhë 24 muaj për faqen e Komisionit Qendror të Zgjedhjeve.
KQZ do të kryejë migrimin e infrastrukturës ekzistuese nga “data centeri” ekzistues në një data-center me veçori të tjera me qëllim rritjen e kapaciteteve cilësisë dhe sigurisë së sistemeve në përdorim. Infrastruktura duhet të ofrojë burime të mjaftueshme.
Shërbimi sidomos në server do të përfshijë aftësi transmetimi audio dhe video, lidhje direkte me internet, instalim dhe konfigurim i serverit dhe mbrojtje adekuate fizike dhe mjedisore e serverëve.
Me sa shohim zgjedhjet e ardhshme, qoftë këto vendore edhe ato të përgjithshme, i ngjajnë përgatitjeve për “luftë kibernetike”. Por pavarësisht se si shkon situata politike, Ilirjan Celibashi i ka marrë masat dhe po hedh qindra milionë lekë duke punuar me plane 3- vjeçare!
Esmerlada Hida
Lexo edhe: Berisha: Ja si do regjistrohet PD në KQZ
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post