Studentët e Mjekësisë kanë vijuar edhe sot protestat kundër ligjit që i detyron ata të qëndrojnë në Shqipëri pas diplomimit. Pas thirrjeve dhe grumbullimeve pranë Ministrisë së Arsimit, ata i janë drejtuar Rektorit të Universitetit të Mjekësisë Tiranë, drejtuesit të së cilit i kanë dërguar edhe një kërkesë.
Me një kërkesë drejtuar Rektorit Arben Gjata, studentët kërkojnë mbështetjen e tij personale dhe të Universitetit për moszbatimin e ligjit që i detyron të punojnë 5 vite në Shqipëri pas përfundimit të studimeve, mbështetjen e lëvizjes së tyre dhe marrjen e masave për të mos lejuar pedagogët të ushtrojnë presion të çdo forme ndaj studentëve me qëllim detyrimin për ndalimin e bojkotit.
Kërkesa e studentëve të Mjekësisë:
I nderuar Z. Rektor,
Siç jeni në dijeni, ne studentët e degës Mjekësi e Përgjithshme jemi prej tri javësh në bojkot të procesit mësimor të vitit akademik 2023-2024. Lëvizja jonë ka përfshirë protesta, bojkotin dhe tashmë nisjen e ndjekjes ligjore në Gjykatën Kushtetuese me qëllim shfuqizimin e ligjit nr. 60/2023 “Për trajtimin e veçantë të studentëve që ndjekin programin e studimit të ciklit të dytë ‘Mjekësi e Përgjithshme’ në institucionet publike të arsmit të lartë”.
Në këtë situatë ne kërkojmë mbështetjen tuaj si titullar i UMT si më poshtë vijon:
1-Deklarimin tuaj publik se Universiteti nuk do të na paraqesë asnjë kontratë në zbatim të ligjit nr 60/2023 deri në përfundim të shqyrtimit të padisë sonë nga GjK.
2-Deklarimin tuaj publik se Universiteti dhe Ju personalisht jeni në krah të studentëve dhe na mbështesni në lëvizjen tonë.
3-Marrjen e masave për të mos lejuar pedagogët të ushtrojnë presion të çdo forme ndaj studentëve me qëllim detyrimin për ndalimin e bojkotit.
Nisur nga situata jonë emergjente, keni kohë të na ktheni përgjigje mbi kërkesat e mësipërme deri të premten, më datë 27 tetor 2023.
Në rast të një mosreagimi nga ana Juaj do të jemi të detyruar të intensifikojmë lëvizjen tonë me marrjen e masave përshkallëzuese.
Me respekt,
Përfaqësuesit e studentëve:
Discussion about this post