Partia Social Demokrate (PSD) në Shkodër ka njoftuar përmes një deklarate zyrtare se do të bojkotojë mbledhjen e radhës së Këshillit Bashkiak më 7 maj. Kjo është hera e dytë që këshilltarët e PSD nuk marrin pjesë, në shenjë kundërshtie ndaj propozimit për kalimin e administrimit të plazhit të Velipojës te një shoqëri aksionere e bashkisë.
Sipas PSD-së, plani i kryetarit të Bashkisë Shkodër, Benet Beci, për të kaluar administrimin te kompania “Bio Strajca sh.a”, lidhet me interesa private familjare, duke akuzuar se kompania e dytë përfituese është e lidhur me bashkëshorten e Becit.Benet Beci kërkon t’u grabisë qytetarëve hapësirat publike në Velipojë dhe t’i kthejë me pagesë… PSD nuk bën kompromis me abuzimin dhe kapjen e pasurive publike nga ana e kryebashkiakut Beci.”
Partia thekson se nuk është kundër ndihmës sociale prej 6%, e cila është gjithashtu në rend dite, por kërkon që kjo të shqyrtohet pas zgjedhjeve parlamentare të 11 majit.
PSD akuzon kryebashkiakun për korrupsion dhe paralajmëron denoncime dhe kërkesë për hetim mbi tenderimet që lidhen me këtë çështje. Partia e konsideron këtë vendim si një përpjekje për t’i kthyer pronat publike në burime përfitimi për rrethin familjar të Becit dhe deklaron se do të mbetet në mbrojtje të interesit publik.
Discussion about this post