Boksieri shqiptar Adam Maca ka realizuar sot një tjetër ndeshje të shkëlqyer dhe si rrjedhoje ka marrë fitoren e dytë rradhazi, duke siguruar në këtë mënyrë edhe medaljen në Kampionatin Botëror të 16 vjeçarëve, që po zhvillohet në Armeni.
Pasditen e djeshme në ring përballe tij ka qenë bjellorusi Tsimur Siankevich, ndaj të cilit ka zhvilluar një ndeshje shumë të mire duke e dominuar ndeshjen dhe duke e detyruar kundërshtarin që të tërhiqet në raundin e dytë. Me këtë ai ka triumfuar dhe shkon më tutje duke i siguruar kombëtares tonë medaljen e bronzte deri tani në këtë eveniment të rëndësishëm. Një sukses mëse i merituar i këtij sportisti dhe i trajnerit që e shoqëron në këtë Botëror, shkodranit Klaudio Çekini.
Në turin e parë, Maca ka qene me fat sepse sipas shortit është kualifikuar direkt për në turin e dytë. Në këtë të fundit është ndeshur me uzbekistanasin Ibromihov Pahlovonjon ndaj të cilit ka triumfuar, duke shkuar në turin e tretë, aty ku dje fitoi edhe ndaj Tsimur Siankevich.
Në këtë mënyre, 15 vjeçari i lindur në Amerikë, por me origjinë nga Mirdita, ka arritur t’i sigurojë deri tani Shqipërisë medaljen e bronztë, por me siguri që Adami nuk do të ndalet këtu,sepse do të tentojë fillimisht medaljen e argjendtë dhe me pas të artën e Kampionatit Botëror.
Por, fillimisht ai do të përqëndrohet tek ndeshja gjysmëfinale që do te zhvilloje ditën e shtunë, ku do të ketë përballe afganistanasin Sahak Amanollah, në ndeshjen e vlefshme për peshën 57 kg.
Discussion about this post