Ashtu siç kishin paralajmëruar, qindra qytetarë janë mbledhur sërish sot në Tiranë për të protestuar kundër rritjes së çmimeve, të cilat i cilësojnë abuzive. Qytetarët kanë vijuar marshimin nga sheshi ‘Skënderbej’, në drejtim të kryeministrisë. Një nga protestuesit iu bënë thirrje qytetarëve që të bashkohen derisa të marrin të drejtat e tyre. Sakaq ai i ktheu përgjigje Ramës, i cili dje tha se u vjen turp që njerëzit protestojnë në kohë lufte. Protestuesi i tha se turp është që lufta ndodh në Ukrainë, por viktima ka në Shqipëri nga uria.
“Jemi në ditën e 5 të rezistencës së qytetarëve, për të fituar të dinjitetin tonë. Ne i themi kryeministrit se është turp të vjedhësh dhe të lësh popullin e varfër. Është turp të thuash jemi në luftë dhe të shkosh në Dubai. Është turp që bombat bien në Ukrainë, por të vdekurit janë në Shqipëri. Po mban vendin më të varfër në rajon, kur kemi më shumë burime se çdo vend tjetër. Ne i themi se nuk dorëzohemi, këtë herë nuk do dorëzohemi”, u shpreh ai.
Në lidhje me planin me 7 pika të propozuar nga kryeministri Edi Rama, për Paketën e Rezistencës Sociale, ato u shprehën se ky është thjeshtë një mashtrim i radhës.
Discussion about this post