Moti i acartë ka pushtuar vendin tonë prej ditësh, ndërsa në zonat malore nuk kanë munguar as reshjet e borës. Korça është përfshirë nga temperatura të ulëta, ndërsa trashësia e borës ka shkuar nga 20cm deri në 40cm.
Autoritetet janë duke punuar për mirëmbajtjen e rrugëve në Voskopojë, Dardhë, në segmentin Korçë-Dvoran si edhe në rrugën Korçë-Qafa e Qarrit –Ersekë ku janë vendosu tre borëpastruese.
Probleme janë shfaqur në 4 fshatra në Moglice të Maliqit të cilat janë pa energji elektrike. Përkatësisht pa energji ka mbetur fshati Kodras, Peshtan, Osoje, Katrian. Sipas raportimeve prej orës 22:00 të mbrëmjes mungon energjia. Edhe në fshatin Miras të Devollit ka pasur shkëputje të energjisë elektrike.
Ndërsa rruga e Arrzës është e vështirë për tu kaluar nga ngricat. Në rrugët rurale në Kolonjë si në fshatrat Gjonc dhe Radac kalimi i mjeteve të vogla është i pamundur pasi trashësia e dëborës, arrin 50-60 cm.
Ndërkohë vijon të mbetet i bllokuar fshati Panarit, po ashtu edhe në Bashkinë Pogradec shumë fshatra kanë mbetur të bllokuar.
Discussion about this post