Ministri i Mbrojtjes Niko Peleshi ka reaguar për situatën nga moti në vend. Peleshi shprehet se akset nacionale janë të kalueshme, duke thënë se po punohet në rrugë me borëpastruese.
Ndërsa Peleshi shprehet në këtë mënyrë, dje në Rrugën e Arbrit, u bllokuan me qindra makina në të ftohtë me njerëz, që ndër të tjera kishin me vete edhe fëmijë të vegjël.
“Në të gjithë territorin e vendit ka patur përmirësim të dukshëm të situatës që u krijua gjatë këtyre ditëve nga moti i keq. Nuk ka banesa nën ujë në Shkodër e Lezhë, por forcat e emergjencave civile, të ndihmuara edhe nga efektivë të FA po qëndrojnë pranë banorëve në zonat, ku ka patur kërkesë për ndihmë.
Po punohet me borëpastruese nga firmat kontraktore dhe ARRSH për zhbllokimin e disa akseve në veri të vendit, në Bogë-Theth, Qafë Thore- Theth, Dushaj-Lekbibaj dhe kriposjen e disa akseve ku ka prani bore. Në të gjitha akset rrugore kombëtare qarkullimi është i lirë.
Janë dërguar ndihma nga Rezervat e Shtetit si: ushqime, batanije, e çadra për familjet në 4 bashkitë e prekura nga tërmeti i 15 janarit në qarkun e Dibrës”, tha Peleshi.
Discussion about this post