Ashtu sikur parashikohet dhe në planbuxhetin e këtij viti, borxhi publik do të shkoj në rritje përgjatë 2022. Madje në fund të 2021 Ministria e Financave shfuqizoi pikat e vendosura më parë për masat kundër rritjes së borxhit dhe fillimin e procesit për reduktimin e tij. E gjithë kjo barrë dhe këto manovra që bënë qeveria do të bjeri në kurriz të qytetarëve. Sipas të dhënave të përpunuara nga “Open Data Albania” për këtë vit taksapaguesit qytetarë do paguajnë 117,343 Lekë më shumë se 2021 për borxhin publik.
“Për vitin 2022, Borxhi Publik për frymë është parashikuar të arrijë vlerën 496,040 Lekë apo rreth 4,099 Euro. Krahasuar me pesë vite më parë, një qytetar Shqiptar do të paguajë rreth 117,343 lekë më shumë, pra një rritje të Borxhit për frymë prej 31%”, thuhet në raport.
Më tutje tregohet se, krahasuar me vendet e Rajonit, për vitin 2020, Shqipëria renditet në vend të tretë pas Malit të Zi dhe Serbisë, ku Borxhi Publik për frymë është vlerësuar respektivisht rreth 7232 euro dhe rreth 3942 euro në secilin prej vendeve. Ndërsa shtetet me koston për frymë të Borxhit Publik më të ulët janë Kosova me rreth 925 euro, Bosnjë dhe Hercegovina me rreth 1953 Euro dhe Maqedonia e Veriut me rreth 2676 euro.
840 mln euro shtesë mbi taksapaguesit
Duke marrë parasysh detyrimet e prapambetura që nga 2021 dhe këto vlera që parashikohen në borxhin publik për këtë vit, ka gjasa që shqiptarët do të duhet të paguajnë 27.2% të të gjithë prodhimit të brendshëm bruto të vendit për të paguar kostot e përgjithshme të qeverisjes, ndërsa një pjesë jo e vogël e kësaj kostoje shtesë lidhet me keqmenaxhimin e vendit dhe punësimet e dyshuara elektorale të ndërmarrjeve publike dhe njësive të pushtetit vendor.
Kujtojmë se sipas parashikimeve të Ministrisë së Financave, buxheti i shtetit pritet të ketë shpenzime totale prej 638 miliardë lekësh dhe të ardhura prej 537 miliardë lekësh. Deficiti buxhetor parashikohet 101 miliardë lekë ose 840 milionë euro. Shqiptarët parashikohet të paguajnë 53 miliardë lekë më shumë taksa e tatime në arkën e shtetit.
Fondi i shpenzimeve operative do të rritet me 38 miliardë lekë ndërsa investimet kapitale do të ulen me 13 miliardë lekë. Fondi i investimeve publike parashikohet të jetë 120 miliardë lekë, një shifër e pazakontë kjo për shkak të rindërtimit nga tërmeti. Por nga ky fond investimesh publike, vetëm 18 miliardë do të financohen nga të ardhurat nga taksat ndërsa e gjithë pjesa tjetër prej afro 101 miliardë lekësh ose 840 milionë eurosh do të financohen me borxh publik.
E.H/Gijotina.com/
Discussion about this post