Policia në Kolumbi është në kërkim të shtetasit serb A.M., i dyshuar për kontrabandë të një sasie të madhe droge nga Amerika e Jugut drejt Evropës, pasi është arratisur në mënyrë spektakolare nga aeroporti i Rionegro, pranë Medellinit, në momentin kur është dashur të ekstradohet në Itali.
Sipas mediave vendase, i dyshuari u arrestua më 9 maj pasi kishte mbërritur në Kolumbi nga Republika Domenikane me dokumente false. Më pas policia konstatoi se ai është një kriminel që bashkëpunon me mafian italiane “Ndrangheta”, i cili dyshohet se ka marrë pjesë në kontrabandën e sasive të mëdha të kokainës, heroinës dhe hashashit nga Amerika e Jugut drejt Europës. Plani i policisë ishte ta hipte në avion dhe t’ia dorëzonte autoriteteve italiane, të cilat e kërkonin prej kohësh.
Megjithatë, kur shtetas serb i shoqëruar nga policia mbërriti në aeroportin “Jose Maria Cordova de Rionegro” të mërkurën në orën 19:30, ai kërkoi leje për të blerë një shishe me ujë, pas së cilës filloi një skenë filmi, përballë disa qindra njerëzve.
I dyshuari ka përfituar nga mosvëmendja e policisë dhe ka filluar të vrapojë në drejtim të daljes. Para aeroportit e priste një xhip Audi Q7 i zi, në të cilin ndodheshin disa burra, ndoshta bashkëpunëtorë të tij. Në një moment ata kanë nisur të qëllojnë ndaj policisë, të cilët janë detyruar të qëllojnë kundër. Megjithatë, shtetasi serb ka arritur të shkojë në makinë dhe të shpëtojë. Policia ka nisur menjëherë ndjekjen e fuoristradës, por ende nuk ka dhënë rezultat. Askush nuk u lëndua nga shkëmbimi i zjarrit.
Discussion about this post