Kombëtarja shqiptare është nisur ditën e sotme në drejtim të Hungarisë për t’u ndeshur të shtunën në mbrëmje në orën 20:45 për kualifikuesen e Botërorit.
Kjo ndeshje vjen pas dy fitoreve për kuqezinjtë ndaj vetë Hungarisë dhe ndaj San Marinos, të dyja të zhvilluara në stadiumin ‘Elbasan Arena’.
Në sfidën që do të zhvillohet këtë të shtunë në “Pushkash Arena” të Budapestit, një ndër avantazhet në letër për ‘Kuqezinjtë’ është mungesa e tifozëve, pasi Federata Hungareze e Futbollit është penalizuar me dy ndeshje pa tifozë, për shkak të racizmit të shfaqur ndaj Anglisë.
Megjithatë siç tha dhe sulmuesi që aktivizohet në një ekip hungarez, Myrto Uzuni, kundërshtarët tanë kanë fituar edhe në mungesë të lojtarit të tyre të 12, ndaj çdo gjë mund të ndodhë.
Ndërsa ditën e sotme u mësua edhe një tjetër mungesë në skuadrën shqiptare pas Hoxhallarit, i cili u infektua me Covid-19, Bekim Balaj u dëmtua në stërvitje dhe nuk do të jetë pjesë e kësaj sfide./K.T/Gijotina.com
