Botërori U-20/ Një gjysmëfinale me shumë… hatërmbetje

Botërori U-20, që po zhvillohet në Argjentinë, po shkon drejt fundit, me turneun që ka mbërritur në fazën gjysmëfinale.

Një nga ndeshjet që priten me shumë kuriozitet është ajo mes Italisë dhe Republikës së Koresë (Koreja e Jugut).

Takimi në vetvete, për shumë ‘millennials’ nuk duket ndonjë “gjë e madhe” por për tifozët e vjetër të Italisë, ekipit kombëtar “A” kryesisht, është shumë domethënës.

Sa herë që përmendet Koreja e Jugut, memoria kthehet te viti 2002, në botërorin famëkeq të zhvilluar në shtetin korean si dhe në Japoni.

Ndeshja Kore e Jugut-Itali, cilësohet në Apenine si një nga skandalet më të rënda në historinë e futbollit.

Ai takim, i gjykuar në mënyrë skandaloze, me tendencë kundër europianëve, nga ekuadoriani Byron Moreno, ishte prova e gjallë e pilotimit të një turneu madhor nga ana e FIFA-s, vetëm e vetëm për të dërguar me çdo kusht një nga vendet organizatore të atij botërori, deri në fazën gjysmëfinale.

Siç dihet tashmë, FIFA ia arriti qëllimit, duke ndihmuar koreano-jugorët që të kalonin edhe Spanjën, pothuajse në të njëjtën mënyrë.

Italianëve nuk i ka dalë inati ende sot e kësaj dite, prandaj sonte në orën 23:00, në “Estadio Unico Diego Armando Maradona”, në La Plata, “Të kaltrit e vegjël” do kërkojnë të hakmerren për vjedhjen që iu bë kombit të tyre, 11 vite më parë.

Kjo ndeshje pritet të jetë shumë e luftuar, kjo prej faktit se luhet për një vend në finalen e botërorit U-20.

Ekipi i trajnerit Carmine Nunziata pritet që të mos ndryshojë shumë përsa i përket formacionit inicial, me teknikun që mund të rreshtojë, nga minuta e parë, të njëjtët lojtarë si në takimin ndaj Kolumbisë.

Desplanches pritet të jetë në portë nga minuta e parë. Zanotti, Ghilardi, Guarino dhe Turicchia, do jenë katërshja e mbrojtjes.

Rombi i mesit të fushës pritet që të përbëhet nga Prati, Giovane, Casadei dhe Baldanzi. Në sulm, favoritë për ta nisur nga minuta e parë janë Esposito dhe Ambrosino./m.b /gijotina.com