Deputeti socialist Erion Braçe e ka nisur fjalën e tij në Kuvend duke e quajtur të drejtë aktin normativ të qeverisë për kompensimin e kompanive të ndërtimit, me kushtin që përfitues të mos jenë kompani që kanë fituar 99.9% të vlerës së tenderit.
Braçe nga ana tjetër vuri theksin edhe te nevoja që paratë që përfitojnë kompanitë të shkojnë dhe për rritjen e rrogave të punëtorëve, ndërsa nuk i ka kursyer kritikat ndaj qeverisë duke thënë se duhet ndalur populizmi dhe të ndihmohen qytetarët.
“Duhet të jemi realist, të qetësojmë tregjet. Ta lëmë politikën dhe populizimin. Si ka mundësi që vijoni propagandën e frikës? Që jemi në situatë të vështirë nuk e mohon kërkush. Shqipëria ka kaluar situata të vështira edhe në kohën tuaj. Bëtë ndonjë paketë ju për të ndihmuar qytetarët? Rritët ndonjë ndihmë ekonomike ju? Të kthehemi në realizëm. Ato rrugët që mbarojnë nuk është interesi i qeverisë. Ky akt normativ nuk mjafton, duhet një tjetër akt ligjor që e detajon. Për mua kompanitë që kanë përfituar një kontratë me 90% të fondit limit nuk duhet kompensuar; kompanitë që kanë nënkontraktuar çmimet e prokurimit nuk duhen kompensuar; kompanitë që janë afateve për probleme nga 2020-2022, nuk duhen kompensuar”, tha Braçe.
Deputeti u ndal dhe te replikat në distancë me Ramën për numrin e lopëve, duke thënë se në shifrat që diskuton, i referohet të dhënave të vetë INSTAT. Sipas Braçes është urgjente nevoja e një burse për Bujqësinë, në mënyrë që grumbulluesit të mos jenë përfituesit më të mëdhenj, duke bërë që bujqit të shndërrohen në skllevër të tokave të tyre.
“Çfarë do të thoni tani që i ka numëruar gabim Erioni, se nuk ka numëruar lopët, dhe e bënë për të vënë në siklet qeverinë. Por e dini që sektori i Bujqësisë nuk ka fituar asgjë nga rritja ekonomike, Turit iu poq shalqini, e dini sa është çmimi, 10 lekë dje në darkë, e dini me sa shitet shalqini jashtë? Me 38 cent, shkon dhe i shet vetes brenda një dite, vazhdon ditën tjetër dhe ia shet sërish vetes në Kosovë, duke prishur tregun”, shtoi ai.
Discussion about this post