Deputeti demokrat Edmond Spaho është një tjetër funksionar i lartë i PD që i shtohet listës së deputetëve që mbështesin ish-kryeministrin Sali Berisha në betejën me Lulzim Bashën.
Lajmin e ka bërë të ditur vetë Spaho në Facebook, ku shkruan PD është në gjendje kritike pas zgjedhjeve të 25 prillit duke theksuar se hapja e partisë, debati dhe dëgjimi i anëtarësisë janë rruga e vetme për të dalë nga kjo krizë.
“Te nderuar demokrate dhe demokratë, PD është në gjendje shumë kritike pas zgjedhjeve të 25 prillit dhe zhvillimeve të mëvonshme. Bunkerizimi i Partisë është sëmundja më e rëndë që na ka zënë dhe për këtë fajtorë jemi të gjithë, në që kemi drejtuar edhe më shumë. Hapja e Partisë, debati midis nesh, kolegjialiteti në vendimmarrje dhe veçanërisht dëgjimi i anëtarësisë janë rruga e vetme për të dalë nga kriza dhe shpëtuar PD.”
Deputeti shprehet se këto janë disa nga arsyet që e shtynë të mbështesë “Foltoren” e Sali Berishës që ka nisur tashmë në disa qytete të ndryshme të vendit.
Janë këto arsyet që më shtyjnë të mbështes dhe marr pjesë në “Foltoren” e organizuar në qytetarë të ndryshme të vendit. Unë “Foltoren” nuk e përkrah për emocion, por për idetë, frymën e lirisë që shpërndan dhe kohezionin. PD është aset i çmuar, që më së pari i përket demokratëve të cdo niveli, të cilët duhet të ndihen të përfaqësuar. Të nderuar miq, mandati i tretë në opozitë për fat të keq ka nisur sipas shprehjes “sezoni i ri avaz i vjetër”. Kemi nevojë për një platformë të mirë menduar se si do ta mundim Edi Ramën në zgjedhje”.
Ndër të tjera, Spaho shkruan se në këto kohë të vështira, PD ka nevojë për një lidership dhe se duhet të përmirësohet organizimi i saj.
Në këto kohë të vështira, PD më shumë se gjithçka, ka nevojë për lidership. Lidershipi duhet ti dalë për zot sfidave, të mbrojë vendimet që merr dhe të jetë në krye të anëtarësisë për t’i çuar ata në fitore. PD duhet të përmirësoje thellësisht organizimin e saj. Ne nuk mund të kthehemi në pushtet me dege pa kryetarë, me kryetarë pa ushtarë apo me ushtarë të lënë të demoralizuar, të braktisur apo të vetmuar nga humbja e 25 Prillit”, shkruan Spaho.
Sipas deputetit, PD duhet gjithashtu të rikonceptojë marrëdhëniet me ndërkombëtarët, dhe se miqësia me ta nuk duhet të jetë vetëm për arsye interesi.
