Universitetet në vendin tonë, kanë 20 mijë studentë më pak në këto 4 vitet e fundit, në krahasim me vitet e mëparshme. Sipas studimit, në 2017-ën ka pasur 17% studentë më tepër se në vitin 2021.
Sipas deputetes Ina Zhupa, kjo gjë ka ndodhur për shkak të keqqeverisjes dhe largimit të të rinjve. Më tej demokratja shkruan se qytetarët zgjedhin të largohen nga mungesa e cilësisë së arsimit dhe jetesës në Shqipëri, por edhe nga mungesa e vendeve të punës. Gjithashtu ka nga ata që e kanë të pamundur të vazhdojnë arsimin e lartë për arsye ekonomike, tarifa të larta edhe në publik, mungesa e bursave dhe lehtësira të tjera.
Sipas statistikave, për dy vitet 2018 dhe 2019, në Gjermani kanë njësuar diplomat 2460 mjekë, infermierë dhe punonjës të shëndetësisë nga Shqipëria.
Ndër të tjera, Zhupa ka reaguar dhe në lidhje me situatën e sotme, ku studentët e pavaksinuar nuk janë lënë të hyjnë në auditorë. Forma e përdorur është pikërisht kërcënimi, duke i detyruar studentët të marrin dozat e vaksinës, pasi në të kundërt do të lihen jashtë.
“Problematikat e krijuara nga ligji i arsimit të lartë, tarifat, karta e studentit me shumë propagandë së shërbime, vështirësitë me mësimin online, dështimi i kërkimit cilësor shkencor dhe kontrollit të cilësisë, statusi dhe pagesat e pedagogëve, janë disa nga problemet që ky vit akademik mbart, si edhe ata paraardhës, nga një keqmenaxhim dhe moskokëçarjes së gjithë drejtuesve të qeverisjes Rama”, shkruan deputetja e Partisë Demokratike.
