Nuk mori pjesë në Foltoren e Shkodrës, kryetarja e bashkisë Shkodër Voltana Ademi u shfaq në Kuvendin e Berishës. Ademi tha se njësoj si në Marsin e vitit ‘92, koha ka ardhur që PD të kthehet në pushtet dhe kjo mund të vijë vetëm përmes bashkimit.
“Të rinjtë po braktisin vendin, PPP po grabisin paratë e shqiptarëve, jemi kthyer në epiqendër të trafikut të drogës, të gjitha pushtetet janë centralizuar në dorë dhe po rrëshqasim në një diktaturë me pamje të rrejshme. Por kjo situatë e rëndë duhet ndryshuar dhe do ta ndryshojmë të gjithë bashkë. Historia shpeshherë bëhet ciklike. Si në vitet ’90, historia thërret në skenë sërish Partinë Demokratike. Në 31 mars 1991, komunistët fituan zgjedhjet e zhvilluara, por më pak se një vit më pas, PD arriti të marrë mbi dy të tretat e votave të shqiptarëve duke e shkëputur vendin nga diktatura. Nuk kishte magji. Ishin të njëjtët shqiptarë që e çliruan me votë. Sot gjendeni thuajse në të njëjtën situatë. Qeverisemi nëpërmjet vjedhjes së votave nga nipër e bij të atyre që ishin pjesë e nomeklaturës. Duket e vështirë që kjo kastë të largohet, por në fakt ata janë të dobët të zhytur në korrupsionin e tyre dhe përvetësimin e pushteteve. Ne e kemi një armë që ia kemi provuar suksesin: bashkimin. Gjërat që na bashkojnë jo vetëm si demokratë e shqiptarë janë më shumë se ndasitë e momentit”, tha Ademi.
Ademi e vetmja kryebashkiake e cila shfaqet në Kuvendin e Berishës, u shpreh se të vetmen armën në dorë PD ka bashkimin. Kujtojmë se në Foltoren e zhvilluar në Shkodër, nga ish-kryeministri Sali Berisha, Ademi nuk mori pjesë dhe nuk lejoi këtë të fundit të përdorë sallën e Teatrit Migjeni për të mbajtur takimin. Nuk dihet ende “çmimi” me të cilin është blerë kryebashkiakja Ademi, por me siguri do të jetë shumë i lartë.
Discussion about this post