Aleatët e PD do të zhvillojnë ditën e sotme një takim për të krijuar një grup të ri parlamentar, duke ndarë kështu rrugët me Partinë Demokratike.
Mësohet se takimi do të zhvillohet në orën 18:00 të pasdites së sotme, për të gjetur gjuhën e përbashkët në mënyrë që të vendosen teknikalitetet për grupin e ri. Sipas tyre, grupi i ri parlamentar po krijohet për të pasur më shumë kohë për të folur në Kuvend.
Pjesë e grupit të ri që pritet të krijohet, është kreu i LZHK-së Dashamir Shehi, kreu i PR Fatmir Mediu, kreu i PAA-së Agron Duka, Vangjel Dule nga PBDNJ, ndërkohë që i vetmi që nuk ka konfirmuar pjesëmarrjen deri tani është Shpëtim Idrizi.
Për të bërë një grup parlamentar nevojiten 7 deputetë, që sipas kreu të LZHK-së Dashamir Shehi janë në radhët e demokratëve. Ai theksoi se kjo nuk është një ndarje nga PD, por një mundësi që opozita të ketë më shumë kohë në dispozicion në Kuvend.
”Nëse unë rri në grupin e PD-së, vendosem i 55-ti, a ku di unë kur bie radhë për të folur. Ndërkohë që kam drejtë të folur më shumë. Jo kur të më teket mua. Për të pasur më shumë hapësira. Për të kontribuar. Për të mos qenë të gjithë me një zë. Ne po mundohemi. Nuk ia kemi mbërritur deri më tani. Tani kemi parë kafen e parë për herë të parë. Do kalojë java e parë dhe do gjejmë një rrugë të përbashkët. PD duhet të ketë një strategji tjetër. Që t’i përfshijë të gjitha forcat”, tha mbrëmjen e djeshme në një intervistë televizive Dashamir Shehi.
PD dhe aleatët e saj garuan më 25 prill nën siglën e koalicionit “Partia demokratike – Aleanca për Ndryshim”, por që pas humbjes në zgjedhje pati një krisje mes PD dhe aleatëve, përfshirë këtu edhe LSI-në, e cila në zgjedhje doli me listë më vete.
