Nga Elton Qyno
Një “breshëri” përjashtimesh, nga trupat e gjykimit në KPK-ë po ndodh ndaj komisionerës së “Vettingut”, Etleda Çiftja, e cila tashmë është faktuar dhe pranuar nga vetë institucioni ku punon, se është marë e pandehur për akuzën e “Falsifikimit të dokumentave” dhe “Deklarimit të remë të pasurisë”.
Megjithëse statusi juridik i Etleda Çiftes, ishte “E PANDEHUR” dhe domosdoshmërisht duhej që më kërkesë të SPAK, të pezullohej nga funksioni i saj si komisionere, çuditërisht Çiftja vijonte punon normalisht madje duke gjykuar prokurorë dhe gjyqtarë.
Rast i rallë në jurisprudencën botërore, ku mund të ndodhi vetëm në Shqipëri, pasi i pandehuri gjykon gjyqtarin dhe prokurorin. Ndërsa në gjithë universin formula e gjykimit është se gjyqtari, gjykon të pandehurin.
Loja e përjashtimit në seri të Etleda Çiftes, fillimisht u hap nga avokati Arben Llangozi, i cili në KPK-ë mbronte interesat juridike të subjektit të rivlerësimit, gjyqtarit të Shkodrës Andri Ymeri.
Gjatë seancës dëgjimore ku palët duhet të jepnin parashtrimet, avokati Llangozi i bëri një pyetje komisioneres Etleda Çiftja,nëse ajo ishte marë e pandehur apo jo nga SPAK?
Komisionerja nuk ju përgjigj, pyetjes së Llangozit por ky i fundit i kujtoi Çiftes se kishte detyrimin ligjor para ligjit dhe shqiptarëve,të tregonte të vërtetën nëse ishte marë e pandehur ose jo?
Nisur nga kjo situatë, Llangozi ju drejtua relatorës së komisionit të gjykimit,Pamela Qirko, duke kërkuar përjashtimin e Etleda Çiftes, pasi prezenca e saj në këtë gjykim, cënon jo vetëm besimin e publikut por bie në kundërshtim me normat ligjore për një proces të drejtë dhe të rregullt.
Kërkesa e Llangozit u pranua qysh në datën 14 qershor, duke vendosur përjashtimin e Çiftes nga trupa e gjykimit, e bashkë me të iku dhe kryesuesi Roland Ilia.
Por tashmë loja e hapur nga Llangozi,po shkon drejt një efekti domino. Kjo pasi Etleda Çiftja është duke u përjashtuar në të gjitha kolegjet e gjykimit ku është zgjedhur.
Dhe dukshëm atë që në fakt, duhet t’ja bënte SPAK-u por në fakt nuk po ja bën, po e realizojnë avokatët dhe subjektet e rivlerësimit, duke kërkuar përjashtimin e Çiftes në gjykimet e tyre.
Jo më larg se pak ditë më parë, ka qënë gjyqtari i Tiranës Altin Abdiu,i cili si Llangozi kërkoi përjashtimin e Etleda Çiftes. Komisioni i ngritur për gjykimin e kërkesës së Abdiut vendosi të pranojë kërkesën e tij, duke urdhëruar përjashtimin e Çiftes.
Të njëjtën praktikë juridike janë duke kryer edhe avokatë të tjerë, të cilët kërkojnë përjashtimin e Çiftes, pasi prezeca e saj në Vetting në një kohë kur është marë dhe e pandehur nga SPAK, cënon rëndë besimin e publikut dhe njëherësh ligjin.
Por ajo që do ishte e drejtë të ndodhte dhe që duhet ligjërisht të ndodhë sipas ligjit penal, është fakti se prokuroria e posaçme SPAK, duhet ti drejtohet me një kërkesë gjykatës së posaçme, duke kërkuar caktimin e masës së sigurimit “Pezullim nga detyra” të komisioneres.
Rasti i Etleda Çiftes, është një rast i përsëritur pasi dhe komisionerë të tjerë,janë marë të pandehur nga prokuroria, dhe më pas është bërë pezulimi i tyre.
Discussion about this post