Ministrja e Shtetit për Policinë dhe ndalimin e kriminalitetit në Britaninë e Madhe Dame Diana Johnson ka deklaruar se policia do të gjurmojë të gjithë ata që janë të përfshirë në incidente, kanë ushtruar dhunë në rrugë apo qoftë edhe duke inkurajuar dhunën në internet.
“Nëse inkurajoni dhunën edhe në internet, ne do të vijmë për ju po aq sa do të vijmë edhe për ju për atë që bëni në rrugët e vendit tonë, nëse jeni duke kryer akte kriminale dhe ushtruar dhunë”, tha Johnson për BBC-në referuar protestave të dhunshme në rrugët e Britanisë së Madhe kundër emigrantëve, të cilat shpërthyen pasi vrasjes së 3 vajzave në Southport nga një emigrant 17-vjeçar.
Johnson ka theksuar se kompanitë e mediave sociale duhet të kuptojnë se kanë përgjegjësi dhe të mos lejojnë postime që nxisin urrejtje racore. Sipas saj, ministrat ishin në diskutime me platformat kryesore të rrjeteve sociale për të ndalur nxitjen e gjuhës së urrejtjes.
Gjithashtu, ajo u shpreh se protestat kundër racizmit nga ana tjetër ishin një shembull i “traditës së protestës paqësore” të Mbretërisë së Bashkuar, duke demonstruar se shumica e njerëzve janë “tolerantë” dhe “i binden ligjit”.
Johnson ka sugjeruar që policia të jetë vigjilente për protestat gjatë ditëve të ardhshme. Sipas saj, mobilizimi i oficerëve të policisë në të gjithë vendin “ka pasur një efekt”.
Referuar të dhënave të policisë britanike, 70% e personave që janë arrestuar në protestat e zhvilluara kundër emigrantëve kanë dënime të mëparshme. Ndërsa autoritetet u kanë bërë thirrje njerëzve që të mos ndikohen nga ideologjia e ekstremit të djathtë.
Policia e ka bërë të qartë se kushdo që ishte i përfshirë në protestat e dhunshme apo ka lëshuar deklarata raciste do të vendoset para ligjit, pasi sipas policisë, po vëzhgohen të gjitha pamjet e kamerave në rrugët e Britanisë së Madhe, ku kanë shpërthyer protestat duke nisur me Acrington, Birmingham, Brighton, Bristol, Harrow, Middlesbrough, Newcastle, North Finchley, Sheffield, Southend, Southampton dhe Walthamstow.
Discussion about this post