Scott Parker u shfaq i kënaqur me reagimin e Burnley-t, pas barazimit 1-1 në transfertë ndaj Bournemouth, një rezultat që u shpëtua në minutën e fundit falë golit të Armando Brojës.
Sulmuesi shqiptar u aktivizua nga stoli dhe u bë protagonist në fundin e takimit, duke finalizuar asistin e Marcus Edwards, i cili gjithashtu hyri si zëvendësues. Kontributi i dy lojtarëve i dha fund një serie negative prej shtatë humbjesh radhazi në kampionat për Burnley-n.
Në prononcimin pas ndeshjes, trajneri i Burnley-t pranoi se skuadra e tij ishte nën presion të madh, por vlerësoi mënyrën se si lojtarët reaguan në fushë. Sipas tij, ekipi kishte treguar shenja përmirësimi edhe në ndeshjet e mëparshme, por gabimet kishin kushtuar shtrenjtë.
Ndjemë shumë presion, por sot pashë diçka pozitive te skuadra. Kemi qenë pranë rezultateve më të mira edhe më herët, por kemi bërë gabime të panevojshme. Këtë herë morëm një pikë të rëndësishme”, u shpreh Parker.
Trajneri anglez foli me humor edhe për faktin që goli erdhi nga dy lojtarë që nisën ndeshjen në stol. “Ndoshta do të më pyesin pse nuk i hodha në fushë që nga fillimi. Kjo është normale, por meritë e madhe për ta. Jam shumë i lumtur për kontributin e tyre”, shtoi Parker.
Barazimi ndaj Bournemouth mund të shërbejë si pikë kthese për Burnley-n, që synon të rikthejë stabilitetin dhe rezultatet pozitive në javët në vijim.
gijotina.com/
Discussion about this post