Sektori bankar në vitin 2021 i rriti ndjeshëm investimet në filiale dhe kompani të kontrolluara. Të dhënat nga Banka e Shqipërisë tregojnë se vlera e aksioneve dhe e instrumenteve të ngjashme të kapitalit të zotëruara nga sektori bankar në fund të muajit tetor 2021 kishte vlerën e 15.4 miliardë lekëve ose rreth 126 milionë eurove. Krahasuar me një vit më parë, vlera e instrumenteve të kapitalit është rritur me pothuajse 66%.
Rritja e vlerës së aseteve të bankave në formën e instrumenteve të kapitalit nuk ka ardhur vetëm nga injektimet direkte të kapitalit, por në një pjesë të madhe nga rritja organike e kapitalit të filialeve, falë fitimeve të akumuluara në kohë, rezervave apo instrumenteve të tjera të ngjashme.
Rritja e këtyre aseteve në afatin e gjatë dëshmon përgjithësisht një ecuri pozitive të investimeve në filiale dhe një aktivitet fitimprurës të tyre.
Struktura e investimeve të sektorit bankar në filiale është e përqendruar kryesisht jashtë vendit.
Aksionet dhe kapitali në bizneset jorezidente përbën rreth 77% të totalit për sektorin bankar shqiptar. Krahasuar me një vit më parë, vlera e këtyre aseteve është zgjeruar me 27%.
Investimet e sektorit bankar në ndërmarrje jorezidente lidhen kryesisht me degë dhe filiale të bankave shqiptare në Kosovë.
Që prej vitit 2008, aty ushtron aktivitet dega e Bankës Kombëtare Tregtare, që në vitin 2019 u shndërrua në njësi të veçantë, e ndarë nga banka mëmë në Shqipëri.
BKT Kosovë ka shënuar rritje të shpejtë në vitet e fundit dhe pjesa më e madhe e instrumenteve jorezidente të kapitalit i takon kësaj kompanie. Në fund të tremujorit të tretë, totali i kapitalit aksioner të BKT-Kosovë arriti ën pothuajse 85 milionë euro.
Gjithashtu, vitin e kaluar në Kosovë nisi aktivitetin edhe banka e dytë me kapital shqiptar, Credins Bank. Credins Kosovë e ka nisur aktivitetin në formën e degës së bankës në Shqipëri dhe në fund të shtatorit 2021 kishte një kapital aksioner neto në vlerën e 9.4 milionë eurove.
Një tjetër bankë shqiptare që ka manifestuar qëllimin për të hyrë në Kosovë është edhe Tirana Bank, por, deri tani, ajo ende nuk është licencuar nga Banka Qendrore e Kosovës.
Megjithëse në pakicë, me rreth 23% të totalit, kapitali në kompanitë rezidente është në rritje edhe më të shpejtë, me 2.6 herë më shumë krahasuar me një vit më parë.
Investimet e bankave në filiale në Shqipëri kanë shkuar kryesisht në institucione financiare jobanka me aktivitet në fushën e qirasë financiare, në shoqëri administrimi të fondeve të pensionit dhe të investimit, si edhe në tregje dhe regjistrarë të letrave me vlerë.
Institucione kryesore financiare të kontrolluara plotësisht apo pjesërisht nga bankat tregtare janë Raiffeisen Leasing, Landeslease, Albania Leasing, Raiffeisen Invest, Credins Invest, ABI Invest, Bursa ALSE dhe ALREG. (MONITOR)
Discussion about this post