Yield-et e bonove 12 mujore të thesarit në tregun primar kanë prekur nivelin më të ulët të dy viteve të fundit.
Të dhënat e Bankës së Shqipërisë tregojnë se në ankandin e kësaj jave, bonot e këtij maturiteti u shitën me një yield mesatar të ponderuar prej 1.52%, nga 1.64% që kishin qenë në ankandin e mëparshëm. Yield-i i regjistruar në këtë ankand është më i ulëti që nga qershori i vitit 2019.
Rënia e yield-eve mund të shpjegohet kryesisht me gjendjen mjaft likuide të sektorit financiar në vend dhe interesin e lartë të investitorëve për të blerë instrumentet e borxhit të qeverisë. Në ankandin e kësaj jave prorata (pjesa) e ofertave konkurruese të pranuara arriti një nivel shumë të ulët prej 7.99%, në rënie për të katërtin ankand radhazi.
Likuiditeti i lartë në tregun financiar është nxitur sidomos nga politika monetare më stimuluese se kurrë që ka ndjekur Banka e Shqipërisë. Që prej marsit të vitit të kaluar, Banka e Shqipërisë e ka ulur normën bazë të interesit në nivelin më të ulët historik prej 0.5%, si edhe ka ndryshuar formën e zhvillimit të ankandeve të REPO-ve, duke ofruar akses në likuiditet me çmim fiks dhe sasi të pakufizuar për bankat tregtare.
Banka e Shqipërisë ka bërë të ditur se kjo formë e injektimit të likuiditetit do të vazhdojë të aplikohet të paktën deri në fund të tremujorit të tretë, duke bërë që edhe orientimet për të ardhmen të nxitin ruajtjen e normave shumë të ulëta të interesit. Në fund të muajit prill, agregati monetar M2, që përfaqëson ofertën monetare në lekë arriti pothuajse 874 miliardë lekë, në rritje vjetore me 11%. Në analizën e fundit të politikës monetare, Banka e Shqipërisë vlerësonte se normat e ulëta të interesit duhet të vazhdojnë, për të mbështetur rimëkëmbjen e ekonomisë reale në rrugën e daljes nga kriza e pandemisë.
Rënia e mëtejshme e yield-eve duket se është favorizuar edhe nga zhvillimet në krahun e ofertës së titujve. Për tremujorin e dytë të vitit, qeveria ka planifikuar një huamarrje totale, përfshi rifinancimet, prej rreth 89 miliardë lekësh, nga pothuajse 97 miliardë lekë në tremujorin e parë. Kjo nënkupton një kërkesë në rënie për financim dhe më pak trysni për rritje të yield-eve.
Yield-et e ulëta të borxhit qeveritar përcaktojnë jo vetëm çmimin e huamarrjes së qeverisë në bregun e brendshëm financiar, por janë njëkohësisht edhe një hallkë e rëndësishme në zinxhirin e transmetimit të politikës monetare. Ato janë treguesi kryesor referues (benchmark) që përdoret edhe në përcaktimin e interesave të huave afatgjatë në lekë edhe për sektorin privat. Kjo është një premisë që edhe normat e interesit të kredisë për sektorin privat të qëndrojnë të ulëta, edhe duke pasur parasysh që kostot e rrezikut duken të kontrolluara dhe raporti i kredive me probleme është i qëndrueshëm.
