Ish-Presidenti, Bujar Nishani, deklaroi pak minuta më parë se PD është në ditët e saj më të këqija dhe se tani ka mbetur përball dy opsioneve, ose të mbetet në këtë gjendje ose të rifillojë me konstrukt të ri. Sipas tij ,që të nis një proces i ri forcimi duhet një drejtues i zoti dhe për të Sali Berisha është më i miri.
“PD është në ditën e saj më trishtuese. Dhe tani ka vetëm dy opsione: Ose të vazhdojë me këtë “status quo”, në këtë kënetë të madhe dhe të shkojë pak nga pak drejt asgjësimit të saj, ose të ridimensionohet në mënyrë dramatike, duke ndryshuar në mënyrë rrënjësore, parimin, strukturat, funksionimin dhe forcën e saj elektorale.
Nuk ka aktor më të fortë se zoti Berisha për të nisur këtë proces. Sepse PD-ja ishte kthyer në një masë amorfe që nuk prodhonte politikë, ide dhe besueshmëri te shoqëria. Duhej ky ndryshim, që nuk po lejohej për shkak të qëndrimeve të zotit Basha pas 25 prillit”, tha ai.
Sipas Nishanit, pengesë për këto ndryshime deri tani ka qenë Basha. “Ndaj anëtarësia e PD-së kërkon referendum, duke qenë e bindur që ai nuk e ka më integritetin për të qenë në krye të PD-së, sepse ka injoruar në mënyrë të hapur strukturat, statutin, ka përçarë PD-së ka hedhur tej trashëgiminë pozitive të PD-së dhe të gjitha funksionet e tij kanë shkuar në shërbim të qeverisë. Hapi i parë është largimi i zotit Basha, të cilin do ta bëjë Kuvendi Kombëtar. Kriza është aq e thellë dhe zgjidhja e saj bëhet vetëm nga anëtarësia. Kuvendi Kombëtar hoqi nga statuti referendumin, ai e rivendos përsëri. Ai mund të bëjë një statut të ri nga fillimi”, tha Nishani.
E.H/ gijotina.com/
