Në muajt e fundit sektori i bujqësisë shënoi rënie në mënyrë paradoksale, pavarësisht masave që mori qeveria për subvencionimin e naftës pa akcize ndaj fermerëve dhe me rritjen e mbështetjes me grante nga fondet IPARD që ishin më të larta sidomos para zgjedhjeve. Sipas raporteve të INSTAT ky sektor ka më shumë mundësi për produktivitet, pasi zë 18 % të PBB, por këto mundësi nuk shfrytëzohen. Banka Botërore ka theksuar se bujqësia në Shqipëri është dobësuar për shkak se forca punëtore nuk paguhet dhe nga keqmnenaxhimin i qeverisë.
Sigurisht që kjo qëndrojnë, se çdo vit kemi dëgjuar nga qeveria se po investon në kanalet ujitëse dhe ato vaditëse, në mënyrë që të rritet prodhimi bujqësor dhe të mbrohemi nga përmbytjet. Në fakt çdo vit ka ndodhur e kundërta, pasi jemi përmbytur dhe shumë zona vuajnë për kanale vaditëse.
Por, qeveria nuk ndalet me kaq vazhdon të shpenzojë miliarda lekë për këto kanale që në fakt nuk janë funksional. Këtë herë Ministria e Bujqësisë ka hapur një tender me 19 lote për riparimin e kanaleve vaditëse. Në tenderin e publikuar nga Agjencia Prokurimit Publik thuhet se në total për këtë projekt do të shpenzohen 866. 303. 595 lekë të reja pa TVSH ose 7. 157. 168 Euro pa TVSH. Shuma do të ndahet në disa pjesë, pasi ministria pretendon se do të riparojë kanalet në disa zona.
Ndërkohë, ajo që na bie në sy është se në këtë tender nuk flitet në asnjë moment për hapjen e kanaleve që do të shërbenin për vaditje apo kullim, që tokat të mos përfundojnë nën ujë sa herë që ka shira. Por, me miliarda lekë do të bëhet vetë “riparimi” i këtyre kanaleve, që pjesa më e madhe janë bërë inekzistent për shkak se prej vitesh nuk është vënë më dorë mbi ta dhe nuk janë më funksional. Ndërsa skandali thellohet kur dokumentet e tenderit tregojnë se riparimet do të bëhen të pjesshme. Me pak fjalë Krifca po “arnon” sistemin kullues e vaditës në vend.
Nuk e di se si Frida Krifca do mund të dërgojë ujë në tokat e buqëve tanë, duke hedhur 15 mln lekë vetëm për rehabilitimin e pjesshëm të një kanali. Kur realiteti tregon që këto kanale nuk kanë nevojë vetëm për rehabilitim. Në dokument thuhet se 38 milionë lekë do të shkojnë për të përforcuar argjinaturën e Lumit Shkrumbin, nuk e dimë pse u kujtua kaq vonë qeveria, kur prej shumë vitesh zona të tëra janë përmbytur sa herë ka pasur reshje. Me vlera kaq marramendëse do të paguhen edhe riparimet për kanale të tjerë, por sikur e cekëm më lartë një pjesë e mirë e tyre janë shkatërruar plotësisht. Pikë tjetër që bie në sy është loti 7, për të cilin do të shpenzohen 93 milionë lekë për forcimin e argjinaturës së lumit Vjosa në Fier, vetëm nga një anë dhe vetëm për një pjesë që kalon ne fshatin Kafaraj.
Premtime boshe
Vazhdimisht qytetarët, agronomë dhe ekspertë kanë nxjerrë në pah rastet ku me qindra hektarë tokë në Shqipëri janë shkatërruar për shkak se janë tharë nga mungesa e ujit, ose nga përmbytjet e vazhdueshme. Zona e Myzeqesë është ajo që vuan më shumë si nga thatësira në verë edhe nga përmbytjet në dimër. Një vit më parë banorët e fshatrave Luz dhe Lekaj në Rrogozhinë kanë treguar se 10 hektarë tokë iu kanë shkuar dëm pasi nuk mund të vadisin fidanët e mbjellë. Ata kanë treguar se një pjesë e kanaleve janë tharë për ujë, ndërsa pjesa tjetër është e bllokuar nga barishtet. Ndërkohë ky probleme vazhdon të jetë edhe sot, pra akoma asnjë investim nga Ministria e Bujqësisë, por fermerët sigurojnë vetë ujin me kushte torturuese dhe që kanë kosto të lartë.
Gjithashtu, banorët e fshatrave në Krujë tregojnë se të mbjellat e tyre rrezikojnë të thahen. Uji për vaditur tokat mungon ndërsa temperaturat rriten. Sipas agronomëve shkak për këtë situatë është mungesa e sistemit të vaditjes ku prej dy dekadash askush nuk vë dorë. Agronomët kanë treguar për mediat se janë 11-12 rezervuarë në rrethin e Krujës me 30 milionë m3 kub ujë por nuk shfrytëzohen.
Në këtë gjendje janë pothuajse të gjithë fshatrat në Shqipëri, prandaj dhe bujqësia po shkon drejt degradimit. Ndërkohë edhe me këto miliarda lekë që po shpenzon qeveria duket që do të bëjë vetëm një punë gjysmake, pasi për çdo lot thekson riparim të pjesshëm, apo forcimin e njërës anë të kanaleve. Kur në fakt sistemi ujitës dhe ai kullues në vend kanë nevojë për ndërhyrje të vërtetë. Kjo na lë të kuptojmë që edhe këtë herë do kemi premtime boshe dhe investime gjysmake/ E.H/ Gijotina.com/
Discussion about this post