Më mirë do të ishte që Këshilli i Ministrave të nxirrte një vendim për t’ia kaluar totalisht Kastratit fondin e furnizimit me karburant të institucioneve dhe të kursente kohën duke bërë tendera fiktivë.
Teksa kemi zbërthyer dokumentet e kontratave tenderuese, Gijotina.com shpesh herë ka ngritur shqetësimin se oligarku Shefqet Kastrati përveçse kontrollon tregun e karburanteve vendos edhe për prokurimet, fondin limit, çmimet e tyre, afatet dhe cilësinë. Këtë pretendim e vërteton çdo tender i radhës që publikohet nga Agjencia e Prokurimeve Publike, ku “Kastrati” valvit “Flamurin e Kuq”, të vendosur nga Open Data si shenjë e riskut të korrupsionit.
Këtë herë Kastrati ka shtrirë dorën tek kryetari i Bashkisë Peqin, Bukurosh Maçi, i cili kishte njoftuar një tender me objekt ‘Blerje karburanti’ në 12 prill 2024. Përmes këtij prokurimi do të blihet naftë dhe benzinë për nevojat e Bashkisë, ku i janë vënë në dispozicion 84 milionë lekë.
Fillimisht për këtë kontratë u paraqiten dy oferta nga; “Kastrati” SHPK dhe “Ergen” sh.p.k. Ky i fundit kishte edhe ofertën më të ulët, 82 milionë lekë.
Për 2 milionë lekë më pak nuk ia vlen të lihet Kastrati në vend të dytë! Por me aq para mund të bëhen shumë gjëra në favor të qytetarëve të thjeshtë. Për shembull, mund të ishin rregulluar disa stenda tregtareve të bujqësisë në Peqin, të cilët akoma vuajnë për një treg të mirfilltë. Mund t’i jepeshin një familje në nevojë të shtynte disa muaj.
Dhe për më tepër, kryetari nuk ka marrë mundimin ta konsiderojë këtë ofertë, por e ka skualifikuar që në fazën e parë, për t’i lënë kështu rrugën e hapur Shefqet Kastratit.
Në datë 22 prill 2024, kur është mbajtur tenderi, në garë ka qenë vetëm oferta e Kastratit, e cila automatikisht është shpallur fituesi.
Këtu është shkelur edhe një tjetër rregull, pasi oferta e Kastratit ka qenë sa 100% e fondit limit, ndërsa udhëzimet kërkojnë që të paktën të ulet vlera deri me 25% të fondit limit.
Ndërkohë na lind një pyetje duke parë se po “digjen” 84 milionë lekë nga makinat. Sa mjete ka Bashkia Peqin në disponim dhe sa punë bëjnë këto? Pse kryetari ka synuar çmimin më të lartë për të blerë 50 mijë litra naftë dhe 3 mijë e 600 litra benzinë? Kjo nuk reflektohet në dokumentet standarde të tenderit ku duhej treguar mënyra si është llogaritur fondi limit.
Nga ana tjetër, megjithëse jepet një parashikim për sasinë naftës që do të furnizohet, kjo nuk mund të konfirmohet, përderisa Kastrati e përcakton vetë çmimin, madje edhe normën e fitimit. Në kontratë përcaktohet se norma e fitimit do të jetë në vlerë absolute 17 lekë/litër.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post