Kryeministri i Maqedonisë së Veriut, Dimitar Kovaçeski, dhe ai i Bullgarisë, Kiril Petkov, kanë dhënë shpresa se së shpejti mund të ketë dakordësi mes dy vendeve për kapërcimin e mosmarrëveshjeve. Sigurisht arritja në një pikë negocimi mes tyre do të sillte heqjen e vetos bullgare për nisjen e bisedimeve të anëtarësimit europian të Maqedonisë së Veriut. Kjo i hap rrugën për negociata edhe vendit tonë, pasi BE ka vendosur që mbledhja e para qeveritare për vendin tonë do të zhvillohet sëbashku me Maqedoninë e Veriut, veprim i cili është penguar nga vetoja e Bullgarisë. Pas takimit në Sofje të shefave të qeverive të shteteve të Europës Juglindore, anëtare të NATO-s, Petkov tha se ka sinjale pozitive për kapërcimin e dallimeve për personalitetet historike dhe çështjet tjera dhe së shpejti mund të ketë marrëveshje. Petkov tha se përshpejtimin e procesit të integrimit të Ballkanit Perëndimor e dikton edhe kriza që u shkaktua me luftën në Ukrainë.
“Pajtohem me vlerësimin se përballë krizës në Ukrainë, Ballkani Perëndimor duhet të jetë më i qëndrueshëm dhe rruga drejt një stabiliteti më të madh mund të arrihet me qasjen e Maqedonisë së Veriut dhe Shqipërisë në BE. Kjo është e qartë dhe besojmë se kjo do të arrihet pasi kemi lajme të mira edhe për çështjet historike mes dy vendeve”, tha ai Kryeministri maqedonas, Dimitar Kovaçevski, tha se procesi i zgjerimit duhet të përshpejtohet pasi çdo vonesë, sipas tij, mund të thellojë pasigurinë, të rrisë mosbesimin e qytetarëve në BE, por edhe t’i nxisë forcat tjera që të rrisin ndikimin në rajon.
Discussion about this post