Për verdheblutë, ky trepikësh nuk ishte thjesht një rezultat pozitiv, por një moment i veçantë që i çon ata në krye të renditjes dhe u jep fund një tabuje ndaj bluve. Për Bunjakun, goli ka vlerë të dyfishtë, pasi është i pari nën fanellën e Elbasanit dhe erdhi në një ndeshje ku skuadra kishte nevojë për një fitore të madhe për moralin dhe për vazhdimësinë e sezonit.
Atmosfera në stadium, mbështetja e tifozëve dhe besimi i trajnerit ishin elementët që i dhanë sulmuesit shtysën për të bërë diferencën. Në një intervistë ekskluzive për “Panorama Sport” pas ndeshjes, Bunjaku flet për emocionet e golit, pritshmëritë e tij për sfidën, mbështetjen që ndjen nga skuadra dhe synimet e tij personale e kolektive për këtë sezon.
Si ndiheni pas golit që i dha fitoren skuadrës?
Normalisht që ndihem shumë mirë, pasi është goli im i parë me fanellën e Elbasanit. Këtë gol ia dedikoj të gjithë tifozëve të Elbasanit dhe veçanërisht trajnerit që ka besuar shumë tek unë.
E prisnit që të shënonit në këtë ndeshje?
Po, edhe e prisja në fakt. E them këtë, sepse jam stërvitur mjaft mirë me skuadrën dhe jam adaptuar shumë shpejt. Falë besimit të trajnerit, stafit, lojtarëve dhe të gjithëve, e kam besuar të shkoja te ky gol dhe t’i dhuroj fitoren e parë Elbasanit me një gol timin.
Si t’u duk atmosfera në stadium?
Këtu atmosfera është gjithnjë e mirë. E kam vënë re që në ndeshjen e parë të Elbasanit që tifozët janë shumë të mirë dhe dhurojnë shumë mbështetje për ne lojtarët dhe ekipin.
E keni mësuar besoj që me golin tuaj keni thyer edhe një tabu ndaj Dinamos?
Po, po. Gjatë këtyre javëve që kam biseduar me skuadrën, sepse unë nuk kam qenë vitin e kaluar, kam mësuar që nuk kanë arritur t’i mposhtin asnjëherë. Kam thënë që do t’i mposhtim kësaj here dhe kam besuar shumë për këtë gjë.
Ndeshjen e ardhshme e keni me Partizanin, shpresoni të shënoni edhe aty?
Shpresoj që së pari të fitojmë për ekipin. Më pas, pse jo, të shënoj dhe vendos ndeshjen.
Tani jeni në krye të vetëm, ndieni ndopak presion apo jo?
Jo, nuk kemi presion fare. Nuk besoj se do të kemi presion mes nesh, sepse jemi një grup i mirë dhe kemi objektiva të qarta. Shpresoj dhe besoj që do të jemi po aty deri në fund të kampionatit.
Cilat janë objektivat personale tuajat?
Objektivat personale janë të ndihmoj ekipin me sa më shumë gola, asistime dhe paraqitje të mira, në mënyrë që ekipi të arrijë objektivat e veta
PANORAMASPORT.AL
Discussion about this post