U dënua me burg të përjetshëm për vrasjen e komisarit Dritan Lamaj, GJK rihap çështjen e Arben Frrokut

Gjykata Kushtetuese ka vendosur që të rihapë çështjen për Arben Frrokun, i dënuar për vrasjen e kryekomisarit Dritan Lamaj.

Vendimi është marrë më datë 17 shkurt dhe urdhëron rihapjen e çështjes në GJK, duke shfuqizuar vendimin e mëparshëm të vitit 2018 të së njëjtës gjykatë.

Frroku kishte kërkuar rihapje të procesit gjyqësor dhe shfuqizimin si antikushtetues të vendimit të datës 29.06.2015 të ish gjykatës së Apelit të Krimeve të Rënda. Po ashtu ai kishte kërkuar edhe kthim të çështjes për rigjykim pranë gjykatës kompetente duke urdhëruar rigjykimin e saj me tjetër trup gjykues.

Arben Frroku u dënua përjetë nga Gjykata e Apelit të Krimeve të Rënda për vrasjen e komisarit Lamaj, por ai ndodhet në burg në Holandë, shtet i cili ka refuzuar ekstradimin e tij.

Frroku iu drejtua Gjykatës së Strasburgut pasi ankimi i tij iu rrëzua edhe në Gjykatën e Lartë më 8 qershor 2017, si edhe në Gjykatën Kushtetuese më 24 prill 2018, duke lënë në fuqi dënimin me burg përjetë.