Rastet e dhunës në familje vijojnë të jenë prezentë në shoqërinë shqiptare, viktimë e të cilave kryesisht janë gratë apo vajzat.
Në emisionin ‘Goca dhe Gra’ u trajtua historia e Etleva Sorrës, 43-vjeçarës nga Kashari i Tiranës.
Jeta për të nuk ka qenë aspak e thjeshtë, pasi ka përjetuar një dhunë të tmerrshme nga bashkëshorti i saj prej 13-vitesh, deri kur mori kurajën për ta denoncuar në polici. Ajo është nënë e 5 fëmijëve.
“E njoha në xhami me një motër myslimane. E pranova se edhe unë isha e divorcuar pa fëmijë, ai i martuar me tre fëmijë. Dhunën e kam pasur që në fillimet e martesës. E kam duruar për 13 vite martesë. Gruaja e tij e parë nuk e pranoi dhe u nda. Unë qëndrova me burrin. Ata u ndanë, unë kam 5 fëmijë me të.
Njësoj pati sjelljen edhe kur lindën fëmijët e mi. Dhuna ka qenë e vazhdueshme, më ka gjuajtur me hekur, dërrasa dhe çekiç, edhe fëmijët sidomos vajzat. Kanë qenë në kohë Ramazani dhe i ka rrahur të dyja vajzat, e ndonjëherë edhe djalin e madh. Unë e duroja dhunën karshi meje, por nuk durova dhunën ndaj fëmijëve. Më vinte keq shumë për vajzat, ata qanin e ai u thoshte mos bëni zë. Vajzën e ma ka rrahur me çekiç.
Familja nuk ka qenë dakord, refuzova familjarët e mi dhe e mora. Ditën e enjte nga ora 3 e natës më merr e më thotë çohu të sqarohemi. Ku ke qenë kur ka ardhur shoku im, i them te dhoma tjetër. Pastaj nisi të më kapte për flokësh e të më gjuante grushte në 3 ë natës. U zgjua në 10 dhe unë po i bëja kafen, kur ai kishte marrë një dërrasë dhe më nxiu me të. Kam qëndruar 1 javë në spital. Edhe me thikë më ka rënë. E pastaj mora në telefon policinë’, u shpreh ajo.
43-vjeçarja shtoi ndër të tjera se bashkëshorti e kërcënon vazhdimisht që të heqë denoncimin, por stepet nga frika për fëmijët.
