Analisti Andi Bushati duke komentuar në edicionin e lajmeve në MCN TV rezolutën e re anti-korrupsion të PS, tha që Rama e ka pranuar tashmë që në qeverisjen e tij po vidhet shumë, por ai kërkon të thotë që s’ka lidhje me këtë vjedhje.
Bushati tha se propozimi synon të mpakë rolin e SPAK-ut, që nuk po e lufton Ramën, por së paku po diskretiton regjimin e tij.
“Është një përpjekje që bën Rama për të thënë një të vërtetë që tashmë s’e fsheh asnjeri, që në qeverisjen e tij ka ‘plasur peshku’ dhe po vidhet shumë, por ai thotë që s’kam lidhje me këtë vjedhje që është bërë. Për të mbrojtur këtë tezë, që dakord po vidhet, por unë s’kam dorë, Rama arriti deri në absurditete që një mendje normale njerëzore s’mund t’i perceptojë. Psh. Rama paraqiti veten si një kalorës, luftëtar kundër një korrupsioni që nuk është në qeverinë e tij, por që është në ADN-në e shqiptarëve pretendon Rama! Rama thoshte që korrupsioni është i trashëguar që nga Perandoria Otomane. Të gjithë i vënë dhjetëra krime regjimit komunist, por askush s’thotë që ka qenë i korruptuar. Rama e bëri të korruptuar edhe regjimin komunist. Pra ‘korrupsionin e kemi trashëgim dhe unë po e luftoj’ tha Rama. Absurditeti i dytë ishte që edhe kur më kapën njerëz rreth e rrotull duke vjedhur, unë s’duhet të japë dorëheqjen, sepse roli i liderit që duhet të prijë luftën kundër korrupsionit është më i fortë se morali i tij. Meraku i Ramës është si të mbulojë fabulën e madhe që e ka kuptuar çdo njeri, që Rilindja ka ardhur me misionin për të vjedhur. Në këtë kuadër është propozimi për rezolutë, dhe propozimi për të bërë ndonjë pakt për të mpakur rolin e SPAK-ut, që nuk e luftojnë Ramën, por e kanë diskretituar regjimin e tij”.
Reagimin e ambasadës amerikane në lidhje me rezolutën, Bushati e sheh si një shkelje syri apo mbështetje për deklaratat e Ramës.
“Po ta lexojmë në mënyrë të drejtpërdrejtë deklarata e SHBA është një shkelje syri apo mbështetje e asaj që Rama tha dje, por problemi është sa duhet t’i marrim deklaratat në mbështetje të stabilokracisë apo një arbitri të ndershëm. Unë besoj se është e para, sepse i kam parë diplomatët amerikanë në ditë më të zeza se kaq. Kur shqiptarët protestonin për fatin e Klodian Rashës, ata bërtisnin si rilindas që ‘fajin e ka Saliu’. Ka një lloj mbështetje të Edi Ramës, jo një mbështetje që të ketë një shoqëri të lirë dhe demokratike në Shqipëri. Çdo njeri me kulturë perëndimore duhet të llahtarisej nga fjalimet e Ramës”.
Discussion about this post