Bushati: Rama kontrollon 95% të mediave, ndryshe do t’i kishte dalë boja në këtë fushatë

Në një analizë mbi klimën politike dhe mënyrën se si po zhvillohet fushata elektorale për zgjedhjet e 11 Majit në vendin tonë, analisti Andi Bushati deklaroi se Edi Rama nuk do të mund të mbante këtë lloj fushate po të mos kishte nën kontroll pjesën dërrmuese të mediave në vend. Në emisionin ‘Çim Peka Live’, Bushati u shpreh se Rama sot është ndryshe nga ai i vitit 2013, kur ende nuk kishte gjithë makinerinë propagandistike në dorë dhe mbështetej në mesazhe sociale, për barazi e drejtësi.

“Kur nuk i kishte të gjitha mediat, fliste për lypsa, për solidaritetin, për sindikatat. Sot flet vetëm për biznesin”, u shpreh Bushati.

Ai gjithashtu, kujtoi se Rama dikur e quante Enver Hoxhën “të madh” për mënyrën se si kishte trajtuar ballistët, dhe kjo, sipas tij, tregon një rrënjë të thellë të propagandës si mjet pushteti.

Sipas tij, ndryshe nga Rama, opozita zhvillon një fushatë tradicionale, me premtime konkrete si rritja e minimumit jetik, që, sipas tij, duhet të jetë edhe objekt diskutimi real në vend, përtej propagandës.

Bushati: “Rama e tregonte edhe në ato fillimet e karrierës së tij. Thoshte: Uaa sa i madh ky Enveri, çfarë i bëri ballistave. Nuk i tha as tradhtarë, as kriminelë, por i tha si kështu parazitë që hanin pula, zhgërryeshin. Në fakt u krijuan breza të tërë me mendjen bosh.

Dhe Rama do t’i dilte boja me këtë lloj fushate po mos të kishte 95% të audiencës televizive që e komandon vet. Kështu ndodh në çdo regjim. Kap fushatën e Edi Ramës, kur nuk i kishte të gjitha mediat nën kontroll. Në 2013 që i duhej të mundte Sali Berishën. Po e dëgjove sot Edi Ramën që e ka të gjithë makinerinë e propagandistikës nën kontroll thotë: Çfarë sindikatash, ku ka e majtë sot, vetëm të ecë biznesi.

Atëherë qante tek studio e Çanit dhe thoshte: Unë si i majtë, kur e shoh një lyps në rrugë nuk them sa mirë e gjeti se këtë meriton, por them si t’i japim dorën ta ngremë këtë lyps dhe ta bëjmë pjesë të shoqërisë.

Filloi propogandë, fliste për taksimin, fliste për pabarazinë shoqërore. Pra, se ti duhet të jesh i vërtetë kur nuk kontrollon gjithë përrallën që ta ngrenë mediat në funksionin tënd.

Edhe PD sot mund të gënjejë, por gënjen dhe bën propozime. Ka fushatë tradicionale. Dhe ne sot duhet të mblidheshim dhe të thoshim: ore, e bën dot Saliu po erdhi në pushtet minimumin jetik 200 euro? Kjo është të bësh një fushatë tradicionale”