Kombëtarja shqiptare e futbollit vazhdimisht është në kërkim të talenteve dhe futbollistëve me potencial, për ta rritur edhe më shumë cilësinë e saj.
Një nga emrat që ka tërhequr vëmendje me paraqitjet e tij është Roko Vata, djali i ish-kapitenit të përfaqësueses kuqezi Rudi Vata.
Mesfushori me tipare sulmuese ka debutuar me përfaqësuesen U-21 të Irlandës, ku edhe shënoi dy gola në sfidën ndaj San Marinos në shtator në eliminatoret e Euro 2025.
Trajneri i Shpresave, Alban Bushi, deklaroi se dera për futbollistin është e hapur në kombëtare.
“Ne shpresojmë shumë që Roko Vata të përfaqësojë Shqipërinë në të ardhme, sepse është një nga lojtarët e datëlindjes 2005 ndër më cilësorët në Europë”, u shpreh Alban Bushi për lajmi.net.
Më herët, Rudi Vata në një intervistë për mediat kosovare deklaroi se nëse djali i tij merr ftesë nga Shqipëria, përgjigja do të jetë pozitive. Mesfushori në 6 paraqitje me ekipin e Celtic B, ka realizuar 6 gola.
Discussion about this post