Deputetja e Partisë Demokratike, Ina Zhupa, deklaroi gjatë mbledhjes së Komisionit të Ekonomisë, se vendimi i maxhorancës socialiste për të rrëzuar dekretin e Presidentit Meta në lidhje me menaxhimin e Parkut Kombëtar të Butrintit është në kundërshtim me Kushtetutën dhe Konventën e Parisit për administrimin e pasurisë kulturore.
Zhupa atakoi deputetët e Partisë Socialiste se ata nuk kanë kurajo për t’i dalë në krah interesit publik dhe të kundërshtojnë agjendën personale të kryeministrit Rama.
“Ishte e pritshme që do të vazhdonit në paligjshmëri duke rrëzuar dekretin e Presidentit. Ju duhet të kishit reflektuar për ta pranuar dekretin, jo për t’i dhënë të drejtë Ilir Metës, por për të mos shkel Kushtetutën, të mos shkelni Konventën e Parisit dhe të zgjidhnin mënyrën më të mirë për të administruar një pasuri kombëtare siç është Butrinti. Ju nuk keni me sa duket këllqe t’i dilni kundër Edi Ramës në vendimmarrjen e tij personale. Me sa duket interesi publik është dorë e dytë përpara interesit partiak”, tha Zhupa.
Deputetja e PD shtoi gjithashtu se Konventa e Parisit nënvizon se pasuritë kulturore nuk mund të merren në menaxhim me koncesion nga fondacionet, pasi duhet të jetë shteti ai i cili duhet të ketë rol kryesor në administrim.
Discussion about this post