Teksa ka komentuar buxhetin e vitit 2022, deputeti i PD Sheferedin Shehu, kritikoi politikën e koncesioneve duke e cilësuar të gabuar dhe me shumë risk për buxhetin e shtetit. Përmes një interviste televizive ai tha se, koncesionet rrezikojnë buxhetin për shkak se jepen pa vlerësuar çdo detaj dhe në pa kriter. Ndërsa përmendi dy projekte me koncesion, ai tha se koncesionet në Shqipëri janë hartuar në atë lloj forme që në fund iu bie barra taksapaguesve. Ndërsa lidhur me sistemin e taksave, ai tha se qeveria bën mirë të dëgjojë sa nuk është vonë FMN dhe të eliminojë planin për amnistinë fiskale.
“Në kohën e qeverisjes së PD është përdorur skema e koncesioneve natyrale dhe jo PPP. Nuk krijonte asnjë risk në buxhetin e shtetit. Nuk u jepnim para. PPP-të tani janë kontrata shërbimi, që janë dhënë pa tender. Koncesionet tani jepen në shëndetësi pa tender, pa vlerësim paraprak dhe llogaritje të eficencës. Mirëmbajtja e rrugës Durrës-Kukës subvencionet nga buxheti i shtetit. Kemi aeroportin e Vlorës, qeveria ka dhënë garanci që nëse nuk realizohet numri i fluturimeve, subvencionet nga buxheti. Kemi koncesione që garantohen nga taksat tona. Duhet një strategji afatmesme për rregullimin e të ardhurave buxhetor. Zero përjashtime nga të gjitha tatimet dhe taksat, pasi krijojnë gropa fiskale. Masa kryesore është heqja e të gjitha favoreve dhe përjashtimeve” tha ai.
Gjithashtu, Sheferedin Shehu kundërshtoi ndarjen buxhetore. Sipas tij, qeveria ka lënë buxhet të tepruar për disa zëra që me shumë gjasa nuk do t’i ezaurojnë dhe ka lënë në nivel të dobët buxhetin për disa zëra që kontribuojnë në rritjen ekonomike. “Dy elementë, rriten shpenzimet e luksit qeveritar 12 mld lekë, që qeveria i justifikon me blerjen e vaksinave, por po të shikosh peshën specifike, 20% shkojnë për situatën e veçantë, të tjerat janë luksi dhe mos harrojmë që kemi një borxh të madh të institucioneve buxhetore ndaj OSHEE-së” deklaroi ai.
Nga ana tjetër ai u shpreh se nuk mbështet propozimin e PD-së për uljen e TVSH-së nga 20 në 6% për produktet e shportës, duke thënë se ka qenë dhe vazhdon që të jetë kundër kësaj nisme.
Discussion about this post