Deputeti i Partisë Socialiste Erion Braçe në Komisionin e Ekonomisë i ka kërkuar Ministrisë së Financave analizë për të gjitha kontrata koncesionare dhe cili është përftimi nga to.
“Koncesioni është instrument i vlefshëm kur kontratat zgjidhen me transparencë, me garë, kur merret çmimi më i mirë i mundshëm, dhe në rastet kur sektori është një sektor kur shtetit nuk bën dot asgjë. Por për sektor që kanë të bëjnë me sigurinë dhe fluksin e mallrave është e tepërt kontrata koncesionare. Shqetësimi im është monitorimi i kontratave, kush është efektiviteti i këtyre kontratave. E kam bërë 100 herë këtë pyetje dhe nuk kam marrë përgjigje” – tha Braçe.
Gjithashtu edhe opozita në komision akuzoi qeverinë se në buxhetin e vitit 2022 nuk ka të publikuar asgjë për risqet që mbartin kontrata koncesionare.
“Në asnjë fjalë të buxhetit dhe relacionit nuk flitet për risqet e kontratave të PPP, inceneratori i Tiranës thoshte 1 miliard lek në vit, në vitin pasardhës paguam në rritje 1.8 miliardë lekë. Janë paguar 30 milionë euro më shumë që si ke të llogaritura. Buxheti nuk reflekton situatën reale” – deklaroi Tabaku.
Ndërsa ministrja Ibrahimaj tha se pagesat e PPP-ve janë në nivelin 3%.
“Kontratat koncesionare, pagesat e PPP janë në nivelin 3% të të ardhurave totale të mbledhura nga 5%” – tha ministrja Ibrahimaj.
1,7 miliardë euro koncesione të reja do të kontraktojë vitin e ardhshëm Qeveria. Janë 7 kontrata të reja që janë listuar në projekt buxhetin 2022, ku koncesioni me vlerë më të madhe është ai i ndërtimit të një prej segmenteve rrugore, autostradës Milot-Fier me vlerë 1.4 miliardë euro.
Discussion about this post