Fatmir Mediu, deputet i opozitës dhe kreu i PR-së, në një intervistë për Euroneës Albania, u shpreh se ka mbështetur me firmë emrin e Oerd Bylykbashit për bashkëkryetar të Reformës Zgjedhore.
Mediu tha se nuk ka asgjë personale me Alibeajn, por sqaroi se gjatë periudhës që ai drejtoi Partinë Demokratike, opozita nuk ishte funksionale dhe në kushte të tilla, nuk mund të mbështeste që ai të ishte bashkëkryetar i komisionit.
Ai tha gjithashtu se Bylykbashi është një figurë me eksperiencë politike e cila duket se ngjall besim te palët opozitare.
“Zoti Bylykbashi është pa dyshim një nga njerëzit që ka eksperiencë të gjatë ne reformën zgjedhore.
Ai është një nga njerëzit që është marrë me reformën zgjedhore, ka përfaqësuar Partinë Demokratike, kur ka qenë zoti Basha, gjithashtu në kohën kur ka qenë zoti Berisha, ne kemi nevojë për një figurë të tillë.
Bashkëkryetar unë kam firmosur që të jetë zoti Bylykbashi, jo se kam gjë personale me zotin Alibeaj, por fakti që nuk ka funksionuar, secili duhet të mbajë përgjegjësitë e veta. Ne nuk kemi funksionuar si ekip opozitar kur zoti Alibeaj përfaqësonte Partinë Demokratike, ndaj nuk duhet të lidhemi te individët.
Unë mendoj se ka nevojë për një drejtues të anës opozitare i cili është i aftë të arrijë konsensusin brenda palëve për të kërkuar pastaj konsensusin me mazhorancën”, u shpreh Mediu.
Discussion about this post