Me tensione është shoqëruar mbledhja e Komisionit të Ligjeve ditën e sotme, ku deputeti Oerd Bylykbashi është përplasur fort me kryebashkiakun e Tiranës Erion Veliaj. Gjatë fjalës së tij në komision, Bylykbashi ngriti si shqetësim ndërtimet pa kriter që bëhen në qytetin e Tiranës dhe atë Durrësi, duke degraduar vendin çdo ditë.
Në debate e sipër Bylykbashi i tha Veliajt se ai po shton numrin e pallateve që ndërtohen dhe rrit çmimin e apartamenteve për të pastruar paratë e pista. Bylykbashi foli edhe për rrezikun e centralizimit të pushtetit, pasi në këtë mënyrë pushteti vendor humbet kompetencat e tij dhe nuk mund të ofrojë shërbime për qytetarët. Sipas tij, qeveria po shkel çdo reformë e çdo ligj vetëm e vetëm për të mbuluar vjedhjet që bën. “Babëzia e ndërtimeve po shkatërron edhe Durrësin, po shkatërron historinë dhe arkeologjinë e këtij qytetit. Paraja kriminale po investohet në ndërtimet në Tiranë dhe jo vetëm, pastrimi i parave po e mban çmimin lart të apartamenteve jo kërkesa. Heqim Tiranën se është shumë e madhe dhe mbledh shumë para. Po ja ku kemi Durrësin që borxhin vetëm të ujësjellësit e ka skandaloz. Janë histori që po çojnë drejt centralizimit të pushtetit. Është për të qeshur tabela sa i përket qarqeve të organeve kushtetuese. Më pas duhet t’i kërkojmë fonde qeverisë qendrore pasi pushteti vendor nuk prodhon dot të ardhura. Kemi bashki që nuk japin dot asnjë shërbim në një territor kaq të vogël në 28 mijë kilometra katrorë. Në të gjithë këtë histori kemi një reformë territoriale të cilën e kemi si një nevojë therëse për ta bërë pa propagandë dhe por për njerëzit”, është shprehur ai.
Ndër të tjera ai tha se qeveria jep leje ndërtimi pa kriter vetëm e vetëm që t’i përdor ato nesër për vota dhe për interesa të tjera të karriges. Sipas tij, qeveria po gënjen çdo ditë pronarët dhe asnjëherë nuk iu ka dhënë dëmshpërblimin që meritojnë për shpronësimin. “Nëse do të merremi edhe me çështjen e pastrimit të parave, nëse fokusi i pushtetit vendor është si të japim sa më shumë leje se ashtu ka më shumë interes, sigurisht që bie interesi në qeverisje. Unë po jap një koment të fundit sepse janë qytetarët që na dëgjojnë. Theksoj se kur bëhen shpronësimet, kurrë mos harroni fondin e dëmshpërblimit të pronarëve të trojeve të cilët ende nuk kanë marrë asnjë dëmshpërblim”, tha ai.
Nga ana e tij Veliaj i hodhi poshtë këto akuza, duke thënë se Bylykbashi po shpif, pasi pronarët e vërtetë që janë shpronësuar kanë marrë dëmshpërblimin që meritojnë.
Discussion about this post