Deputeti demokrat Oerd Bylykbashi shkruan në një status në rrjetet sociale se vota e emigrantëve është domosdoshmëri. Ai thotë se qeveria duhet të nisë urgjent regjistrimin e emigrantëve pa asnjë pengesë, ndërsa thekson se KQZ duhet të mundësojë infrastrukturën e plotë dhe transparente. Bylykbashi shton se kjo duhet të fillojë tani që në fund të mos themi që nuk kemi kohë, duke e konsideruar votën e emigrantëve imperativ për zgjedhje të lira dhe të ndershme.
“Vota e emigrantëve është domosdoshmëri! (në vend të një propozimi për reformën e radhës) Shqipëria ka 4,7 milionë shtetas të regjistruar. Po po, aq! Dhe 3,6 milionë prej tyre janë zgjedhës.
Zyrtarisht në Shqipëri jetojnë diçka më shumë se 2,8 milionë banorë. Por, pas hemorragjisë së frikshme demografike të shqiptarëve nga humbja e çdo shprese gjatë tetë viteve të qeverisë Rama, nuk besoj se në vend ka me shumë se 2,5-2,6 milionë banorë. Prej tyre jo më shumë se 2 milionë janë zgjedhës.
Shumë pak. Aq pak zgjedhës jetojnë në Shqipëri, saqë ata janë lehtësisht të kontrollueshëm nga sistemi i patronazhistëve të qeverisë, inspektoratet shtetërorë gjobëvënëse, dhjetëramijëra nëpunësit militantë të administratës që u jepet urdhëri të mbledhin vota për të mbrojtur vendin e punës, apo edhe nga rrjetet kriminale. Nuk ka rëndësi çfarë mendojnë këta zgjedhës, nuk ka rëndësi revolta e tyre për vjedhjen e përditëshme dhe për rritjen çmimeve të produktve jetike, të energjisë e kush e di çfarë tjetër do të shtrenjtohet sëshpejti. Rëndësi ka që ata zgjedhës të kontrollohen nga shteti i partisë në pushtet ditën e votimit.
1,7 milionë zgjedhes është maksimumi i atyre që dalin e votojnë këtu. Shumë pak. Ky është një problem i madh të cilin reformat e zgjedhore të radhës në letër nuk munden ta zgjidhin. Në përvojën time 20 vjeçare me reformat zgjedhore, ku kemi bërë lloj-lloj përpjekjesh për të përmirësuar zgjedhjet, e di mirë se një tufë nenesh shtesë në një Kod me mbi 200 nene, nuk e ndalin dot vullnetin malinj të ushtrisë së partisë-shtet për të grabitur zgjedhjet e shqiptarëve” – u shpreh Bylykbashi.
Edhe ish kryeministri Sali Berisha, në foltoren e zhvilluar në Kukës premtoi se do bëntë çdo gjë që të rikthente votën e emigrantëve.
